છેતરપિંડીના કેસમાં કંપનીના CEOને પોલીસે નાશિકથી પકડ્યો
નોટિસ આપ્યા વિના પુણેની હિંજવડીની બ્રાન્ચ બંધ કરીને ૫૦૦થી વધુ કર્મચારીઓને બેરોજગાર કરનારી થિન્કટેક ઇન્ડિયા OPC પ્રાઇવેટ લિમિટેડ IT ફર્મ.
નોએડાની થિન્કટેક ઇન્ડિયા OPC પ્રાઇવેટ લિમિટેડ નામની ઇન્ફર્મેશન ટેક્નૉલૉજી (IT) ફર્મની પુણેની હિંજવડીની બ્રાન્ચ અચાનક જ બંધ કરી દેનારા કંપનીના ચીફ એક્ઝિક્યુટિવ ઑફિસર (CEO) હર્ષલ ઠાકરેની પોલીસે મંગળવારે રાત્રે નાશિકથી ધરપકડ કરી હતી. બાવીસમી એપ્રિલે કર્મચારીઓને કોઈ પણ જાતની નોટિસ આપ્યા વગર કંપની બંધ કરી દેવામાં આવતાં ૫૦૦ જેટલા કર્મચારીઓ બેરોજગાર થઈ ગયા હતા. આ મામલે ફર્મમાં કામ કરતી ઇન્ટર્ને ફરિયાદ નોંધાવી હતી.
લૅપટૉપ માટે ૧૫,૦૦૦ રૂપિયા લીધા, લૅપટૉપ જ ન આપ્યું
ફરિયાદમાં જણાવવામાં આવ્યા મુજબ અનેક કર્મચારીઓ પાસેથી લૅપટૉપની સિક્યૉરિટી ડિપોઝિટ તરીકે ૧૫,૦૦૦ રૂપિયા લેવામાં આવ્યા હતા. અનેક કર્મચારીઓએ તેમની પાસેથી પૈસા લીધા પછી લૅપટૉપ અપાયું જ ન હોવાનો દાવો કર્યો હતો. છેલ્લા બે મહિનાથી પગાર ન ચૂકવાયાનો દાવો પણ કર્મચારીઓએ કર્યો હતો.
ADVERTISEMENT
કંપનીએ લગાવ્યો ૧૧.૨૫ લાખનો ચૂનો
અત્યાર સુધીમાં પોલીસે ૩૦ કર્મચારીઓનાં નિવેદન નોંધ્યાં છે, જેના આધારે તેમની પાસેથી કુલ ૧૧.૨૫ લાખ રૂપિયા પડાવાયા હોવાનું સામે આવ્યું છે. ભવિષ્યમાં વધુ કર્મચારીઓ ફરિયાદ નોંધાવવા આગળ આવે તો વધુ રૂપિયાનો ગોટાળો સામે આવી શકે છે.
