Nagpur Airport Bomb Threat: મંગળવારે સવારે નાગપુર ઍરપોર્ટને એક ઈમેલ દ્વારા બૉમ્બથી ઉડાવી દેવાની ધમકી મળી, જેનાથી ખળભળાટ મચી ગયો. સવારે 7:30 વાગ્યાની આસપાસ મોકલવામાં આવેલા આ ઈમેલમાં દાવો કરવામાં આવ્યો હતો કે સિગારેટના પેકેટમાં IED મૂકવામાં આવ્યો છે.
પ્રતીકાત્મક તસવીર (સૌજન્ય: મિડ-ડે)
મંગળવારે સવારે નાગપુર ઍરપોર્ટને એક ઈમેલ દ્વારા બૉમ્બથી ઉડાવી દેવાની ધમકી મળી, જેનાથી ખળભળાટ મચી ગયો. સવારે 7:30 વાગ્યાની આસપાસ મોકલવામાં આવેલા આ ઈમેલમાં દાવો કરવામાં આવ્યો હતો કે સિગારેટના પેકેટમાં IED (બૉમ્બ) મૂકવામાં આવ્યો છે, જે ગમે ત્યારે ફૂટી શકે છે.
માહિતી મળતાની સાથે જ ઍરપોર્ટ પ્રશાસને તાત્કાલિક સોનેગાંવ પોલીસ સ્ટેશનને જાણ કરી હતી. આ પછી પોલીસ, બૉમ્બ ડિસ્પોઝલ સ્ક્વૉડ, ડૉગ સ્ક્વૉડ અને ફાયર બ્રિગેડની ટીમો ઘટનાસ્થળે પહોંચી ગઈ હતી અને ઍરપોર્ટ પરિસરમાં સઘન સર્ચ ઑપરેશન શરૂ કર્યું હતું.
ADVERTISEMENT
મંગળવારે સવારે નાગપુર ઍરપોર્ટ પર બૉમ્બ હોવાની ધમકી અંગે ઍરપોર્ટ ઑથોરિટી ઑફ ઈન્ડિયાને એક ઈમેલ મળ્યો હતો. ત્યારબાદ આ માહિતી ઍરપોર્ટ ઑથોરિટીને આપવામાં આવી હતી, એમ અધિકારીએ પીટીઆઈને જણાવ્યું હતું.
તેમણે કહ્યું કે સંબંધિત સમિતિએ ધમકીના ઈમેલનું મૂલ્યાંકન કર્યું હતું અને પોલીસ અને બૉમ્બ ડિટેક્શન અને ડિસ્પોઝલ સ્ક્વૉડ સહિત વિવિધ સુરક્ષા એજન્સીઓએ જરૂરી તમામ તપાસ હાથ ધરી હતી. અધિકારીએ જણાવ્યું કે કંઈ શંકાસ્પદ મળ્યું નથી.
સવારે 6.30 વાગ્યાની આસપાસ આવેલા આ ઈમેઇલમાં દાવો કરવામાં આવ્યો હતો કે ઍરપોર્ટ પર સિગારેટના પેકેટના વેશમાં એક ઇમ્પ્રુવાઇઝ્ડ એક્સપ્લોઝિવ ડિવાઇસ (Improvised Explosive Device) મૂકવામાં આવ્યો હતો.
આ ઈમેઇલ સૌપ્રથમ ઍરપોર્ટ ઑથોરિટી ઑફ ઈન્ડિયા (Airport Authority of India) ને મળ્યો હતો, જેણે તેને તાત્કાલિક નાગપુર ઍરપોર્ટ અધિકારીઓને મોકલ્યો હતો. પ્રોટોકોલનું પાલન કરીને, તમામ મુખ્ય હિસ્સેદારોને સતર્ક કરવામાં આવ્યા હતા અને તાત્કાલિક કટોકટી પ્રતિભાવ ટીમોને એકત્ર કરવામાં આવી હતી, એમ એક વરિષ્ઠ ઍરપોર્ટ અધિકારીએ જણાવ્યું હતું.
સોનેગાંવ પોલીસ સ્ટેશને બૉમ્બ ડિટેક્શન એન્ડ ડિસ્પોઝલ સ્ક્વૉડ (BDDS), CISF અને ડોગ સ્ક્વૉડ સાથે મળીને લગભગ ચાર કલાક સુધી વિગતવાર સર્ચ ઑપરેશન હાથ ધર્યું હતું. અધિકારીઓએ જણાવ્યું કે, કોઈ શંકાસ્પદ વસ્તુ કે ઉપકરણ મળી આવ્યું ન હતું.
સોનેગાંવ પોલીસ ઇન્સ્પેક્ટર નીતિન મગરે પુષ્ટિ આપી હતી કે, "ઍરપોર્ટ પર કોઈ વિસ્ફોટક મળી આવ્યો નથી. અમે સ્ટાન્ડર્ડ ઑપરેટિંગ પ્રોસિજરનું પાલન કર્યું હતું. ચેતવણીને ગંભીરતાથી લેવામાં આવી હતી, અને તમામ જરૂરી એકમોએ ઝડપથી પ્રતિક્રિયા આપી હતી," તેમણે ઉમેર્યું હતું કે આ મામલે કેસ નોંધવામાં આવશે.
સૂત્રોએ જણાવ્યું હતું કે ધમકીથી થોડી ચિંતા થઈ હતી, પરંતુ ઍરપોર્ટ પર ફ્લાઇટ ઑપરેશન મોટાભાગે અપ્રભાવિત રહ્યા હતા.
પોલીસ અધિકારીઓએ ભારપૂર્વક જણાવ્યું હતું કે આ ઇમેઇલ ખાસ કરીને નાગપુર ઍરપોર્ટ તરફ નિર્દેશિત હતો, જે ગયા વર્ષે દેશભરના અનેક ઍરપોર્ટ પર મોકલવામાં આવેલી બનાવટી ધમકીઓથી વિપરીત હતો. સંદેશના મૂળને શોધવા અને જવાબદારોને ઓળખવા માટે તપાસ ચાલુ છે.
