હરિયાણાના પાણીપતમાં પગની ઈજાની સારવાર માટે દાખલ કરાયેલી મહિલાની પરિવારની મંજૂરી વગર હાર્ટમાં સ્ટેન્ટની સર્જરી કરાઈ હોવાનો આરોપ છે. સર્જરી બાદ મહિલાનું મૃત્યુ થતાં હૉસ્પિટલ સામે ગંભીર બેદરકારીના આક્ષેપ થયા છે.
પગનું હાડકું તૂટી ગયું હતું, ડૉક્ટરોએ કરી નાખી હાર્ટ-સર્જરી
હરિયાણાના પાણીપતમાં એક હૉસ્પિટલમાં બેજવાબદારીની ચરમસીમા કહેવાય એવો કિસ્સો બહાર આવ્યો છે. એક અકસ્માતમાં ઘાયલ થયેલી મહિલાનું પગનું હાડકું તૂટ્યું હતું. ગુડ્ડી દેવી નામની આ મહિલાના દીકરા કુલદીપે માને સારવાર માટે હૉસ્પિટલમાં ભરતી કરી હતી. કુલદીપનું કહેવું છે કે માને માત્ર પગમાં ઈજા હતી, પરંતુ હૉસ્પિટલમાં ભરતી કર્યાના બીજા દિવસે અમને ખબર પડી કે ડૉક્ટરો તેમની સર્જરી કરી રહ્યા છે. પરિવારજનોને લાગ્યું કે કદાચ આ સર્જરી હાડકાંને જોડવા માટેની હશે. જોકે જ્યારે મહિલાને ઑપરેશન થિયેટરમાંથી બહાર લાવવામાં આવી ત્યારે ખબર પડી કે ડૉક્ટરોએ તો તેમની હાર્ટ-સર્જરી કરી નાખી છે. ડૉક્ટરોનું કહેવું હતું કે તેમના હૃદયની નળીઓમાં બ્લૉકેજ હોવાથી સ્ટેન્ટ બેસાડવો જરૂરી હતી. જોકે પરિવારજનોનું કહેવું હતું કે તેમણે આવી કોઈ સર્જરી માટે હામી ભરી જ નહોતી. સ્ટેન્ટ નાખવાની બિનજરૂરી પ્રોસીજર પછી ગુડ્ડી દેવીની હાલત કથળતી જ ગઈ અને સારવાર દરમ્યાન તેમનું મૃત્યુ થઈ ગયું.
