કલકત્તાએ ઑલરાઉન્ડર કૅમરન ગ્રીનને બદલે પ્લેઇંગ ઇલેવનમાં સ્પેશ્યલિસ્ટ બૅટરને રમાડવો જોઈએ : ગાવસકર

પીઠની સમસ્યાને કારણે કૅમરન ગ્રીનને ટુર્નામેન્ટની શરૂઆતમાં પેસ બોલિંગ કરવાની મંજૂરી ક્રિકેટ ઑસ્ટ્રેલિયા તરફથી મળી નથી.

સુનીલ ગાવસકર

કૉમેન્ટેટર સુનીલ ગાવસકરે IPLની ૧૯મી સીઝનના ઑક્શનના સૌથી મોંઘા ખેલાડી કૅમરન ગ્રીન વિશે મોટું નિવેદન આપ્યું છે. પીઠની સમસ્યાને કારણે કૅમરન ગ્રીનને ટુર્નામેન્ટની શરૂઆતમાં પેસ બોલિંગ કરવાની મંજૂરી ક્રિકેટ ઑસ્ટ્રેલિયા તરફથી મળી નથી. કોલકાતા નાઇટ રાઇડર્સનો ૨૫.૨૦ કરોડ રૂપિયાનો આ ખેલાડી બે મૅચમાં ૧૬૬.૬૬ના સ્ટ્રાઇક-રેટથી ૨૦ રન જ કરી શક્યો છે. સુનીલ ગાવસકરે કહ્યું હતું કે ‘જો કૅમરન ગ્રીન બોલિંગ ન કરે તો કલકત્તાએ પોતાના ટીમના સંયોજન પર પુનર્વિચાર કરવાની જરૂર છે. જો તે બૉલની સાથે બૅટથી પણ યોગદાન ન આપી રહ્યો હોય તો પ્લેઇંગ ઇલેવનમાં બીજા નિષ્ણાત બૅટ્સમૅનને લાવવાનું વિચારવું પડી શકે છે. તેનું તાજેતરનું ફૉર્મ ખાસ પ્રભાવશાળી રહ્યું નથી.’