૩ ગોલ્ડ, ૪ સિલ્વર અને ૧૧ બ્રૉન્ઝ સાથે પૅરા બૅડ્મિન્ટન ચૅમ્પિયનશિપમાં ભારતીય ટીમ જીતી ૧૮ મેડલ
બૅડ્મિન્ટન વર્લ્ડ ચૅમ્પિયનશિપમાં ભારતના ખેલાડીઓ
થાઇલૅન્ડના પટાયામાં ભારતના સુહાસ યથીરાજ, પ્રમોદ ભગત અને કૃષ્ણા નાગરે પૅરા બૅડ્મિન્ટન વર્લ્ડ ચૅમ્પિયનશિપમાં પ્રભાવશાળી પ્રદર્શન કર્યું હતું. ત્રણેય પુરુષોની સિંગલ્સ એસએલ4, એસએલ3 અને એસએચ6 ઇવેન્ટમાં અનુક્રમે ગોલ્ડ જીતવામાં સફળતા મળી છે. વિશ્વના ત્રીજા નંબરના યથિરાજ એસએલ4 ફાઇનલમાં ઇન્ડોનેશિયાના ફ્રેડી સેટિયાવાનને ૨૧-૧૮, ૨૧-૧૮થી હરાવીને પ્રથમ વિશ્વ ખિતાબ જીત્યો છે. ૩૫ વર્ષના પૅરાલિમ્પિક સુવર્ણચંદ્રક વિજેતા ભગતે ૨૦૧૫માં સ્ટૉક મેન્ડેવિલે અને ૨૦૧૯માં બેસલ પછી આ જીત સાથે ટાઇટલની હૅટ-ટ્રિક પૂરી કરી હતી. તે ૨૦૨૨ ટોક્યો પૅરાલિમ્પિકમાં પણ ગોલ્ડ મેડલ જીત્યો હતો. એસએચ6 કૅટેગરીમાં, પૅરાલિમ્પિક સુવર્ણચંદ્રક વિજેતા કૃષ્ણા નાગર પણ મેન્સ સિંગલ્સની ફાઇનલમાં ચીનના લિન નીલીને ૨૨-૨૦, ૨૨-૨૦થી હરાવીને ચૅમ્પિયન બન્યો હતો. મહિલા સિંગલ્સ એસયુ5માં મનીષા રામદાસ ફાઇનલમાં ચીનની યાંગ ક્વી ઝિયાને ૧૬-૨૧, ૧૬-૨૧થી હરાવીને સિલ્વર મેડલ જીતી હતી. ૩ ગોલ્ડ, ૪ સિલ્વર અને ૧૧ બ્રૉન્ઝ સાથે ભારતીય ટીમ પૅરા બૅડ્મિન્ટન ચૅમ્પિયનશિપમાં ૧૮ મેડલ જીતી છે.
