હવે ડાયટ કોક પીવાનો નહીં, પહેરવાનો ટ્રેન્ડ આવ્યો

ડાયટ કોકનું ઑબ્સેશન એટલું વધી ગયું છે કે યુવાનો મગ, ટમ્બલર, બૅગ્સ, રગ્સ, મોબાઇલ કવર અને શૂઝમાં આ ડિઝાઇનની પ્રિન્ટ પસંદ કરી રહ્યા છે

ડાયટ કોક પહેરજો

યંગસ્ટર્સ માટે કોઈ બ્રૅન્ડ માત્ર એક પ્રોડક્ટ નથી હોતી, પણ એક આખી લાઇફસ્ટાઇલ બની જતી હોય છે. આવો જ એક અનોખો અને સુપર કૂલ ટ્રેન્ડ હાલમાં સોશ્યલ મીડિયા પર ચાલી રહ્યો છે તે છે ડાયટ કોક ઑબ્સેશન. હા, તમે બરાબર વાંચ્યું. જે ડાયટ કોક ક્યારેક માત્ર કૅલરી-કૉન્શિયસ લોકોની પસંદગી હતી, તે જેન-ઝી અને મિલેનિયલ્સ માટે એક મોટું ફૅશન સ્ટેટમેન્ટ બની ગઈ છે. હવે વાત માત્ર ફ્રિજમાં ડાયટ કોકનાં કૅન રાખવા પૂરતી સીમિત નથી રહી, પણ સવારના કૉફી મગથી લઈને પગના શૂઝ સુધી બધે જ ડાયટ કોકની સિગ્નેચર રેડ ઍન્ડ સિલ્વર ડિઝાઇન રાજ કરી રહી છે.

પૉપ્યુલરિટી પાછળનું કારણ શું?

ADVERTISEMENT

આજના યુવાનોને રેટ્રો અને પૉપ-કલ્ચર ખૂબ આકર્ષે છે. ડાયટ કોકનો જે સિગ્નેચર વાઇબ છે, તે એક મિનિમલ છતાં બોલ્ડ લુક આપે છે. પિનટેરેસ્ટ અને ઇન્સ્ટાગ્રામ પર ડાયટ કોક ઍસ્થેટિક રીલ્સ અને ફોટોઝ લાખોની સંખ્યામાં વાઇરલ થઈ રહ્યા છે. યુવાનો હવે સામાન્ય વસ્તુઓ ખરીદવાને બદલે આવી લિમિટેડ એડિશન કે થીમ-બેઝ્ડ ચીજો વસાવવાનું વધુ પસંદ કરે છે, જે તેમને ભીડથી અલગ પાડે છે. ગ્લોબલ પૉપસ્ટાર ટેલર સ્વિફ્ટ, હૉલીવુડ ઍક્ટ્રેસ બેન એફ્લેક અને પ્રખ્યાત ફૅશન મૉડલ્સ ઘણી વાર રનવે પાછળ કે પબ્લિક પ્લેસમાં ડાયટ કોક કૅન અથવા એની મર્ચન્ડાઇઝ સાથે કૅમેરામાં કેદ થાય છે. ફૅશન-ડિઝાઇનર્સ પણ હવે સત્તાવાર રીતે બ્રૅન્ડ સાથે કોલૅબરેશન કરીને લિમિટેડ એડિશન બૅગ્સ અને શૂઝ માર્કેટમાં મૂકી રહ્યા છે, જે આ ક્રેઝ વધવાનું મુખ્ય કારણ છે.

શું છે ટ્રેન્ડમાં?

ગઈ કાલ સુધી જે બ્રૅન્ડ લિક્વિડ રિફ્રેશમેન્ટ તરીકે ઓળખાતી હતી, તે આજે ગ્લોબલ ફૅશન આઇકન બની ગઈ છે. યુવાનોના રૂમમાં માત્ર ડાયટ કોકનાં મગ કે ટમ્બલર જ જોવા નથી મળતાં, પણ માર્કેટમાં હવે ડાયટ કોક થીમ આધારિત કસ્ટમાઇઝ્ડ બૅગ્સ, શૂઝ અને કૂલ મોબાઇલ કવર્સની ડિમાન્ડ આસમાને છે. સોશ્યલ મીડિયા ઇન્ફ્લુઅન્સર્સ પોતાના ઍસ્થેટિક લુકને કમ્પ્લીટ કરવા માટે હાથમાં ડાયટ કોકના કલર-કોડવાળી ઍક્સેસરીઝ ફ્લોન્ટ કરતા જોવા મળે છે.

કૉફી મગ, ઑફિસ કે કૉલેજમાં સાથે રાખવા માટેનાં ટ્રેન્ડી ટમ્બલર્સ અને બૉટલ્સ, ઍરપોડ્સ કેસ, બેડરૂમની દીવાલો પર લગાવવા માટેનાં વિન્ટેજ ડાયટ કોક પોસ્ટર્સ, નિયોન સાઇન લાઇટ્સ અને ફ્રિજ મૅગ્નેટ્સ પણ લોકોની પહેલી પસંદ બની રહ્યાં છે. આ ઉપરાંત ડાયટ કોકના લોગો અને એના કલર કૉમ્બિનેશનવાળાં ઓવરસાઇઝ્ડ ટી-શર્ટ્‍સ, કમ્ફર્ટેબલ હૂડીઝ, મોજાં, કસ્ટમાઇઝ્ડ સ્નીકર્સ, ટોટ બૅગ્સ, કૅનના આકારનાં નાનાં પાઉચ, કીચેઇન્સ પણ લોકોને પસંદ પડી રહ્યાં છે.

શું છે આ ‘ધ ફ્રિજ સિગારેટ’ સ્લેંગ?

સોશ્યલ મીડિયા પર આ એક નવો શબ્દ ફેમસ થયો છે. જેમ જૂના જમાનામાં લોકો પોતાની સ્ટાઇલ માટે સિગારેટ રાખતા, તેમ આજના યુવાનો હાથમાં ડાયટ કોક રાખવાને સ્ટેટસ સિમ્બૉલ અને કૂલ પર્સનાલિટી સ્ટેટમેન્ટ ગણે છે.