યુવતીઓમાં વધી રહ્યો છે બર્ડ નેસ્ટ ક્લિપનો ક્રેઝ

વર્કિંગ વિમેનથી લઈને કૉલેજ ગર્લ્સ સુધી સેકન્ડ્સમાં આકર્ષક લુક આપતી આ હેર-ક્લિપ ઇન્સ્ટાગ્રામ પર બહુ વાઇરલ થઈ રહી છે

પ્રતીકાત્મક તસવીર

ફૅશનની દુનિયામાં કમ્ફર્ટ અને સ્ટાઇલનું કૉમ્બિનેશન પૉપ્યુલર છે અને ખાસ કરીને હેર-ઍક્સેસરીઝની વાત કરીએ તો દરરોજ કંઈક નવું ટ્રેન્ડમાં આવતું હોય છે. સોશ્યલ મીડિયાથી લઈને લોકલ માર્કેટ સુધી અત્યારે બર્ડ નેસ્ટ હેર-ક્લિપ બહુ ડિમાન્ડમાં છે. પક્ષીના માળા જેવી ડિઝાઇન ધરાવતી આ ક્લિપ માત્ર દેખાવમાં જ યુનિક નથી, પણ તે વાળને સેકન્ડ્સમાં પરફેક્ટ લુક આપવા માટે પણ મૅજિકલ સાબિત થઈ રહી છે. આ હેર ક્લિપનું નામ સાંભળીને જ તેને જોવા જાણવાની ઇચ્છા થાય. આ ક્લિપ પ્લાસ્ટિક અથવા રેઝિન મટીરિયલની બનેલી હોય છે. તે દેખાવમાં ગોળાકાર હોય છે અને તેને ખેંચીને મોટી કરી શકાય છે. જ્યારે તેને વાળમાં ફિક્સ કરવામાં આવે છે ત્યારે તે સંકોચાઈને પક્ષીના માળા જેવો આકાર લઈ લે છે, જેને કારણે તેનું નામ બર્ડ નેસ્ટ ક્લિપ કહેવાય છે. અંદરના ભાગમાં નાના દાંતા હોય છે, જેને લીધે તે વાળમાંથી સરકી જતી નથી.

માર્કેટમાં કેવા પ્રકારની ક્લિપ મળે?

ADVERTISEMENT

મૅટ ફિનિશ અને પેસ્ટલ કલર્સ: ઑફિસ કે ડેઇલી વેર માટે ઑલિવ ગ્રીન, ન્યુડ પિન્ક, બેજ અને બ્લૅક જેવા ક્લાસી મૅટ કલર્સ ખૂબ ટ્રેન્ડમાં છે.

વેલ્વેટ ટચ : શિયાળામાં કે કોઈ ફંક્શનમાં રિચ લુક આપવા માટે વેલ્વેટ મટીરિયલ કોટિંગવાળી ક્લિપ્સ પણ મળે છે.

ડાયમન્ડ અને પર્લ સ્ટડેડ : જો તમારે લગ્નપ્રસંગ કે પાર્ટીમાં સાડી કે લહેંગા સાથે પહેરવી હોય તો પર્લ અને ચમકતા સ્ટોન્સ જડેલી ફૅન્સી બર્ડ નેસ્ટ ક્લિપ પણ માર્કેટમાં આસાનીથી મળી રહે છે.