વિશ્વના દેશોમાં પ્યૉર વીગન સ્કૂલો ખૂલી રહી છે, યુરોપિયન દેશોમાં ટૂંક સમયમાં સરકારી કાર્યક્રમોમાં સંપૂર્ણપણે પ્લાન્ટ બેઝ્ડ ફૂડ પીરસવાની દિશામાં વિચારો થઈ રહ્યા છે ત્યારે ભારતના આ રાજ્યમાં બાળકોના મીલમાં ઈંડું સામેલ કરવાની કવાયત થઈ રહી છે.
સ્પેશ્યલ સ્ટોરી
પ્રતીકાત્મક તસવીર
મિડ-ડે મીલ ભારતના દરેક રાજ્યમાં અન્ડરપ્રિવિલેજ્ડ બાળકોને સ્કૂલ આવવા મોટિવેટ કરવામાં શરૂ કરાયેલી સ્કીમ છે. બાળકો ભણવા નહીં તો જમવા તો આવે અને એ રીતે દેશનાં બાળકોના શારીરિક ઘડતરમાં અડચણ ન આવે. આપણે મિડ-ડે મીલની વાત એટલા માટે કરી રહ્યા છીએ, કારણ કે હાલમાં જ મહારાષ્ટ્રમાં મિડ-ડે મીલમાં અઠવાડિયામાં એક વખત બાળકોના આહારમાં ઈંડું આપવું એવો નિર્ણય લીધો, જેના પગલે વેજિટેરિયન લોકોએ એનો વિરોધ કર્યો છે. ભારત સિવાય લગભગ ઈંડાનો વિવાદ અન્ય કોઈ દેશમાં થવો મુશ્કેલ છે અને એનું કારણ છે કે વિશ્વમાં સૌથી વધારે વેજિટેરિયન પૉપ્યુલેશન અહીં ભારતમાં જ છે. ગયા વર્ષે કર્ણાટકમાં આ જ મુદ્દા પર વિવાદ થયો હતો. જોકે ભારતનાં ૧૪ રાજ્યોના મિડ-ડે મીલમાં ઈંડું આપવામાં આવે છે અને એનું કારણ એ છે કે ત્યાં નૉન-વેજિટેરિયન પૉપ્યુલેશન વધારે છે. વેજિટેરિયન પૉપ્યુલેશનને ઈંડાં ન આપવા પાછળ ધાર્મિક અને સાંસ્કૃતિક કારણો હોઈ શકે, પરંતુ વિજ્ઞાનની દૃષ્ટિએ શું ઈંડું આપવું જોઈએ કે નહીં? શું ઈંડામાંથી જ માત્ર ‘એ’ ક્લાસ પ્રોટીન મળી શકે? જો વેજિટેરિયન પાસે પ્રોટીન સોર્સ ન હોય તો ઈંડાં ખાવાનું શરૂ કરે? તો આ ગણિત શું છે એ જાણીએ વિવિધ એક્સપર્ટ અને આમજનતા પાસેથી.