સેન્ટ્રલ ઝૂ ઑથોરિટીએ આપી મંજૂરી : ૮૩ પ્રજાતિઓનાં ૨૭૦૦ જેટલાં દેશી અને વિદેશી પશુ-પક્ષીઓ બનશે આકર્ષણનું કેન્દ્ર
ડીસામાં એશિયાનો પહેલો ડેઝર્ટ થીમ ઝુ અને નાઇટ સફારી બનશે
ઉત્તર ગુજરાતના ડીસામાં ગુજરાતના વન વિભાગ દ્વારા એશિયાનો પહેલો ડેઝર્ટ થીમ આધારિત ઝુઓલૉજિકલ પાર્ક અને ડ્રાઇવ-થ્રૂ નાઇટ સફારી બનશે. આ પાર્કને સેન્ટ્રલ ઝૂ ઑથોરિટી દ્વારા મંજૂરી મળી છે. આ પાર્કમાં ભારતીય, આફ્રિકન અને ઑસ્ટ્રેલિયાનાં ૮૩ પ્રજાતિઓનાં ૨૭૦૦ જેટલાં દેશી અને વિદેશી પશુ-પક્ષીઓ સહેલાણીઓમાં આકર્ષણનું કેન્દ્ર બનશે.
ગુજરાતના વન અને પર્યાવરણપ્રધાન અર્જુન મોઢવાડિયાએ કહ્યું હતું કે ‘વન્યજીવ સંરક્ષણ અને ઇકો ટૂરિઝમને પ્રોત્સાહન આપવાના હેતુ સાથે આ પ્રોજેક્ટ બની રહ્યો છે. ૫૪૨.૧૪ કરોડ રૂપિયાના અંદાજિત ખર્ચે જૂના ડીસા ખાતે આશરે ૧૦૩ હેક્ટર વિસ્તારમાં સેન્ટ્રલ ઝૂ ઑથોરિટીની માર્ગદર્શિકા પ્રમાણે આ પ્રોજેક્ટ તૈયાર થઈ રહ્યો છે.’
ડીસા ખાતે બની રહેલું ઝૂ એશિયાનું પ્રથમ ડેઝર્ટ થીમ આધારિત ઝૂ હશે જે વિશ્વનું આ પ્રકારનું ત્રીજું ડેઝર્ટ થીમ ઝૂ હશે અને વિશ્વનું ચોથું નાઇટ સફારી ઝૂ બનશે. આ પ્રોજેક્ટ સહેલાણીઓને વન્યજીવોના અનુભવોની સાથે સંરક્ષણ, પ્રજનન, વન્યજીવન રેસ્ક્યુ, પુનર્વસન, પર્યાવરણીય શિક્ષણ અને કુદરતના વૈજ્ઞાનિક અર્થઘટન માટેના કેન્દ્ર તરીકે પણ કામ કરશે.
સૂર્યાસ્ત બાદ જોઈ શકાશે નિશાચર પ્રાણીઓ
ADVERTISEMENT
આ પાર્કમાં નાઇટ સફારી સહેલાણીઓને આકર્ષણ પૂરું પાડશે. સૂર્યાસ્ત બાદ ખાસ ડિઝાઇન કરાયેલા અેન્ક્લોઝરમાં નિશાચર પ્રાણીઓને જોઈ શકાશે. આ રીતના પાંચ એન્ક્લોઝર હશે. આ પ્રોજેક્ટમાં એક અલગ ડે ઝૂ હશે. અલગ-અલગ પ્રજાતિનાં પ્રાણીઓ માટે અલગ-અલગ એન્ક્લોઝર, પક્ષીઘર, સરિસૃપ ઘર, બટરફ્લાય પાર્ક, ઇન્ટરપ્રિટેશન સેન્ટર, ફૂડ કોર્ટ, સોવેનિયર શૉપ, ગૉલ્ફ કાર્ટ સહિતની સુવિધાઓ ઉપલબ્ધ કરાવવામાં આવશે.
