અમેરિકામાં મોટો રોડ-એક્સિડન્ટ: પિકઅપ ટ્રકે લઇ લીધો ભારતીય એન્જિનિયરનો જીવ

Indian techie dies in US: આંધ્રપ્રદેશના ૨૬ વર્ષીય સોફ્ટવેર એન્જિનિયરનું ઓહાયોના મેસેડોનિયામાં એક માર્ગ અકસ્માતમાં મોત નિપજ્યું છે, પોલીસ તપાસ ચાલુ; ન્યૂયોર્ક સ્થિત ભારતીય કોન્સ્યુલેટ અને સમુદાય સંગઠનો મૃતદેહને ભારત લાવવા સહાય કરી રહ્યાં છે

સોફ્ટવેર એન્જિનિયર દિલીપ કુમાર બુંગતાવુલા (તસવીર સૌજન્યઃ સોશ્યલ મીડિયા)

અમેરિકા (United States) માં એક પિકઅપ ટ્રકે ડિવાઈડર (સેન્ટર મીડિયન) ક્રોસ કરીને સામેથી આવતી કારને જોરદાર ટક્કર મારતાં ૨૬ વર્ષીય ભારતીય સોફ્ટવેર એન્જિનિયરનું કરૂણ મોત નીપજ્યું છે. આ જીવલેણ માર્ગ અકસ્માત ૭ ઓગસ્ટના રોજ ઓહાયો (Ohio) ના મેસેડોનિયા (Macedonia) વિસ્તારમાં ઇન્ટરસ્ટેટ ૪૮૦ પર સર્જાયો હતો, જેમાં અન્ય ત્રણ લોકો ઈજાગ્રસ્ત થયા છે.

ઇન્ટરસ્ટેટ ૪૮૦ પર સામસામે ભયાનક ટક્કર

ADVERTISEMENT

સ્થાનિક પોલીસ અને ઇમરજન્સી સેવાઓના જણાવ્યા અનુસાર, મૃતકની ઓળખ આંધ્રપ્રદેશ(Andhra Pradesh) ના કડપા (Kadapa) જિલ્લાના જેટ્ટીવારીપલ્લી (Jettivaripalli) ગામના ૨૬ વર્ષીય સોફ્ટવેર એન્જિનિયર દિલીપ કુમાર બુંગતાવુલા (Dileep Kumar Bungatavula) તરીકે થઈ છે. દિલીપ પોતાની સેડાન કાર લઈને ઇન્ટરસ્ટેટ ૪૮૦ પરથી પસાર થઈ રહ્યો હતો ત્યારે સામેથી આવતી એક પિકઅપ ટ્રક (Indian techie dies in US) અચાનક રોડનો મીડિયન ક્રોસ કરીને સામે આવી ગઈ હતી.

પિકઅપ ટ્રકે અતિશય વેગ સાથે દિલીપની કારને સામેથી જોરદાર ટક્કર મારી હતી. અકસ્માત સ્થળે પહોંચેલા ઇમરજન્સી ટીમના કર્મચારીઓએ દિલીપને બચાવવાનો પ્રયાસ કર્યો હતો, પરંતુ ગંભીર ઈજાઓના કારણે તેને સ્થળ પર જ મૃત જાહેર કરવામાં આવ્યો હતો. આ અકસ્માતમાં ઘવાયેલી અન્ય ત્રણ વ્યક્તિઓને તાત્કાલિક સારવાર માટે નજીકની હોસ્પિટલમાં ખસેડવામાં આવી હતી.

ભારતીય મિશને પીડિત પરિવારને મદદની ખાતરી આપી

આ દુઃખદ ઘટનાના સમાચાર મળ્યા બાદ ન્યૂયોર્ક સ્થિત ભારતીય કોન્સ્યુલેટે ઊંડા શોકની લાગણી વ્યક્ત કરી હતી અને ભારતમાં રહેતા મૃતકના શોકગ્રસ્ત પરિવારને તમામ સત્તાવાર સહાય પૂરી પાડવાની પુષ્ટિ કરી હતી. સોશિયલ મીડિયા પ્લેટફોર્મ X પર એક નિવેદન જારી કરીને કોન્સ્યુલેટે ભારતીય નાગરિકના અકાળ અવસાન અંગે દુઃખ વ્યક્ત કર્યું હતું અને જણાવ્યું હતું કે જરૂરી કાનૂની પ્રક્રિયાઓ પૂર્ણ કરવા અને મૃતદેહને ભારત લાવવા માટે અધિકારીઓ પરિવારના સીધા સંપર્કમાં છે.

ઉપરાંત, નોર્થ અમેરિકા તેલુગુ સોસાયટી (NATS) સહિતના સમુદાય સંગઠનો પણ મદદ માટે આગળ આવ્યા છે. સામાન્ય ખેડૂત પૃષ્ઠભૂમિ ધરાવતા દિલીપના માતા-પિતાને શૈક્ષણિક લોનની ચુકવણી અને મૃતદેહના પરિવહનના ખર્ચમાં મદદ કરવા માટે ક્રાઉડફંડિંગ ઝુંબેશ પણ શરૂ કરવામાં આવી છે.

ઉજ્જવળ કારકિર્દીનો કરૂણ અંત

દિલીપ ઉચ્ચ શિક્ષણ મેળવવા માટે અમેરિકા ગયો હતો અને તેણે ૨૦૨૫માં કેન્ટ સ્ટેટ યુનિવર્સિટીમાંથી માસ્ટર ઓફ સાયન્સ (M.S.) ની ડિગ્રી મેળવ્યા બાદ સોફ્ટવેર પ્રોફેશનલ તરીકે નોકરી શરૂ કરી હતી. કડપા જિલ્લામાં વસતા તેના પરિવારજનોએ તેને એક મહેનતુ અને મહત્વાકાંક્ષી યુવાન તરીકે યાદ કર્યો હતો, જે પોતાના સમગ્ર પરિવારની આશાઓનું કેન્દ્ર હતો.

ઓહાયોની સ્થાનિક પોલીસે અકસ્માતના આ કેસમાં તપાસ શરૂ કરી છે જેથી પિકઅપ ટ્રક ચાલકે સ્ટિયરિંગ પરથી કાબૂ શા માટે ગુમાવ્યો અને ટ્રક હાઈવે મીડિયન ક્રોસ કરીને સામે કેવી રીતે આવી ગઈ તેનું કારણ જાણી શકાય.