ઈરાન કૂણું પડ્યું, દુશ્મનો સિવાયનાં તમામ જહાજોને પસાર થવાની મંજૂરી આપી દીધી

ડોનલ્ડ ટ્રમ્પે હોર્મુઝ સ્ટ્રેટ ખોલવા માટે ઈરાનને ૪૮ કલાકનું અલ્ટીમેટમ આપ્યું

ડોનલ્ડ ટ્રમ્પ

અમેરિકાના પ્રેસિડન્ટ ડોનલ્ડ ટ્રમ્પે હોર્મુઝ સ્ટ્રેટ ખોલવા માટે ઈરાનને ૪૮ કલાકનું અલ્ટીમેટમ આપ્યા બાદ ઈરાને દુશ્મનો સાથે જોડાયેલાં જહાજો સિવાયનાં તમામ જહાજોને હોર્મુઝ સ્ટ્રેટમાંથી પસાર થવાની મંજૂરી આપી છે. આ અહેવાલો સૂચવે છે કે તેહરાને વ્યૂહાત્મક શિપિંગ લેન પર અમેરિકા અને ઇઝરાયલ સાથે વધતા તનાવ વચ્ચે કૂણા પડીને શરતી દરિયાઈ ઍક્સેસની ઑફર કરી છે. ઈરાન કહે છે કે જળમાર્ગ આંતરરાષ્ટ્રીય શિપિંગ માટે ખુલ્લો રહેશે, પણ જેને એ દુશ્મન માને છે એવાં જહાજોને એમાંથી પસાર થવા દેવામાં નહીં આવે.

હોર્મુઝ સ્ટ્રેટ મુદ્દે ટ્રમ્પનું અલ્ટીમેટમ

ADVERTISEMENT

અમેરિકન પ્રેસિડન્ટ ડોનલ્ડ ટ્રમ્પે રવિવારે ઈરાનને અલ્ટીમેટમ આપ્યું હતું, જેમાં ચેતવણી આપવામાં આવી હતી કે જો તેહરાન ૪૮ કલાકની અંદર હોર્મુઝ સ્ટ્રેટ ફરીથી ખોલશે નહીં તો અમેરિકા ઈરાની પાવરપ્લાન્ટ્સ પર લશ્કરી હુમલો કરી શકે છે. ભારતીય સમય મુજબ ગઈ કાલે સવારે ૫.૧૪ વાગ્યે ટ્રમ્પે આ પોસ્ટ કરી હતી જેમાં ઈરાનને મંગળવાર સવાર સુધીનો સમય આપવામાં આવ્યો છે. ટ્રુથ સોશ્યલ પરની પોસ્ટમાં ટ્રમ્પે લખ્યું હતું કે જો ઈરાન ૪૮ કલાકની અંદર કોઈ પણ ધમકી વિના હોર્મુઝ સ્ટ્રેટને સંપૂર્ણપણે ખોલશે નહીં તો અમેરિકા એના વિવિધ પાવરપ્લાન્ટ્સ પર હુમલો કરશે અને એનો નાશ કરશે, સૌથી મોટા પાવરપ્લાન્ટથી શરૂઆત કરવામાં આવશે.

ડિસેલિનેશન સુવિધાઓ પર હુમલો કરવાની ધમકી

આ પહેલાં ઈરાને મિડલ ઈસ્ટના અમેરિકા અને ઇઝરાયલના બેઝ અને ડિસેલિનેશન સુવિધાઓ પર હુમલો કરવાની ધમકી આપી હતી. ઈરાનની આ ચેતવણી ગલ્ફ પ્રદેશ માટે ગંભીર અસર કરી શકે છે. ઈરાની અધિકારીઓએ સંકેત આપ્યો હતો કે જો તનાવ વધતો રહેશે તો મુખ્ય માળખાકીય સુવિધાઓ જોખમમાં મુકાશે. આ પરિસ્થિતિમાં ડિસેલિનેશન પ્લાન્ટ એક ગંભીર ચિંતા તરીકે ઊભરી આવ્યો છે. ગલ્ફ દેશો એમના પીવાના પાણીના પુરવઠા માટે ડિસેલિનેશન પ્લાન્ટ્સ પર ખૂબ આધાર રાખે છે. આ સુવિધાઓમાં કોઈ પણ વિક્ષેપ પ્રદેશના રોજિંદા જીવન માટે ગંભીર પરિણામો લાવી શકે છે. એક અહેવાલમાં ચેતવણી આપવામાં આવી છે કે સાઉદી અરેબિયાના જુબેલ ડિસેલિનેશન પ્લાન્ટ પર હુમલો કરવામાં આવે તો એક અઠવાડિયાની અંદર રિયાધના ૮૫ લાખ રહેવાસીઓને સ્થળાંતર કરવાની ફરજ પાડી શકે છે.