દેશની ઝૂંપડપટ્ટીનાં લાખો બાળકોનાં શિક્ષિકા છે, ઇન્ટરૅક્ટિવ એજ્યુકેશનલ પેઇન્ટિંગ દ્વારા દીવાલને અનોખા ક્લાસરૂમમાં ફેરવી નાખે છે
દુબઈના ક્રાઉન પ્રિન્સ શેખ હમદાન બિન મોહમ્મદ બિન રશીદ અલ મકતૂમે રૂબલ નાગીને ગ્લોબલ ટીચર પ્રાઇઝ 2026 આપ્યું હતું.
દુબઈમાં યોજાયેલી વર્લ્ડ ગવર્નમેન્ટ સમિટમાં ભારતીય ટીચર રૂબલ નાગીને ગ્લોબલ ટીચર પ્રાઇઝ ૨૦૨૬ મળ્યું છે. GEMS એજ્યુકેશન દ્વારા તેમને એક મિલ્યન ડૉલરનું એટલે કે ૯ કરોડ રૂપિયાનું પ્રાઇઝ આપવામાં આવ્યું છે. દુબઈના ક્રાઉન પ્રિન્સ શેખ હમદાન બિન મોહમ્મદ બિન રશીદ અલ મકતૂમે રૂબલ નાગીને ગ્લોબલ ટીચર પ્રાઇઝ આપ્યું હતું.
૧૩૯ દેશોમાંથી ૫૦૦૦થી વધુ અરજીઓ આવી હતી. એમાંથી ઝૂંપડપટ્ટીનાં બાળકોને ભણાવતાં રૂબલ નાગીની પસંદગી કરવામાં આવી હતી.
ADVERTISEMENT
અવૉર્ડ સ્વીકાર્યા પછી રૂબલ નાગી ભાવુક થઈ ગયાં હતાં. તેમણે કહ્યું હતું કે ‘આ પ્રાઇઝ ૨૪ વર્ષની મહેનતનું પરિણામ છે. મારું એકમાત્ર ધ્યેય દરરોજ સવારે ઊઠીને ભારતના સૌથી દૂરના ઝૂંપડપટ્ટી વિસ્તારોમાં જઈને બાળકોને શીખવવાનું અને શીખવાનું હતું. બાળકોના શિક્ષણમાં ક્યારેય વિક્ષેપ ન આવવો જોઈએ. ભારતના દરેક બાળકને સ્કૂલમાં જતું જોવું એ મારું સપનું છે.’
રૂબલ નાગીએ ‘મિસાલ ઇન્ડિયા’ નામનો સેલ્ફ-હેલ્પ પ્રોગ્રામ બનાવ્યો છે જે ૧૦૦થી વધુ ઝૂંપડપટ્ટીઓ અને ગામડાંઓમાં ૧૦ લાખથી વધુ બાળકોને ઓછા ખર્ચે, આર્ટ-બેઝ્ડ શિક્ષણ પૂરું પાડે છે. સાથે બાળકોને વ્યાવસાયિક તાલીમની માહિતી પૂરી પાડે છે. તેમણે ‘મિસાલ મુંબઈ’ નામનો પ્રોગ્રામ પણ બનાવ્યો છે. ધારાવીની ઝૂંપડપટ્ટીની સુધારણાની પહેલના ભાગરૂપે ૧,૫૫,૦૦૦થી વધુ ઘરોને રંગવામાં આવ્યાં હતાં તથા સ્વચ્છતા અને પીવાના પાણીની ગુણવત્તામાં સુધારો કરવામાં આવ્યો હતો.
રૂબલ નાગી આર્ટ ફાઉન્ડેશન દ્વારા દીવાલો પર ઇન્ટરૅક્ટિવ એજ્યુકેશનલ પેઇન્ટિંગ કરવાના તેમના પ્રયાસો બદલ સન્માનિત કરવામાં આવ્યાં હતાં. પેઇન્ટિંગ્સ દ્વારા તેઓ દીવાલને એક ક્લાસરૂમમાં ફેરવી નાખે છે. રૂબલ નાગીએ ૬૦૦થી વધુ શિક્ષકો અને સ્વયંસેવકોની ભરતી કરી છે અને તાલીમ આપી છે જેઓ બાળકોની શૈક્ષણિક, સામાજિક અને આર્થિક જરૂરિયાતોને પૂરી કરે છે અને એક સ્કેલેબલ મૉડલ બનાવે છે.
