Gujarati Mid-day

ઇ-પેપર

વેબસ્ટોરીઝ

વેબસ્ટોરીઝ


App banner App banner
હોમ > સમાચાર > મુંબઈ સમાચાર > આર્ટિકલ્સ > મુંબ્રા: ઍન્ટિ-કરપ્શન બ્યુરોની મોટી કાર્યવાહી, ૨૭ વૉર્ડનને પણ હટાવી દેવાયા

મુંબ્રા: ઍન્ટિ-કરપ્શન બ્યુરોની મોટી કાર્યવાહી, ૨૭ વૉર્ડનને પણ હટાવી દેવાયા

Published : 22 November, 2026 08:16 AM | IST | Mumbai
Gujarati Mid-day Correspondent | feedbackgmd@mid-day.com

મોટરિસ્ટ પાસેથી પાંચ હજાર રૂપિયાની લાંચ લેવાના ચક્કરમાં ટ્રાફિક ડિપાર્ટમેન્ટના પંચાવન પોલીસની ટ્રાન્સફર

પ્રતીકાત્મક ફાઇલ તસવીર (મિડ-ડે)

પ્રતીકાત્મક ફાઇલ તસવીર (મિડ-ડે)


થાણેમાં ટ્રાફિક નિયમોના ઉલ્લંઘન બદલ જપ્ત કરાયેલું ડ્રાઇવિંગ લાઇસન્સ પરત અપાવવા માટે વાહન-ડ્રાઇવર પાસેથી પાંચ હજાર રૂપિયાની લાંચ લેવાના મામલે થાણે ઍન્ટી-કરપ્શન બ્યુરો (ACB)એ કડક કાર્યવાહી કરી છે. આ ઘટનાના પગલે થાણે પોલીસ પ્રશાસને કડક વલણ અપનાવીને મુંબ્રા ટ્રાફિક વિભાગના સિનિયર પોલીસ-ઇન્સ્પેક્ટર અતુલ અહેર સહિત ત્રણ અધિકારીઓ અને બાવન કૉન્સ્ટેબલ મળીને કુલ પંચાવન પોલીસને તાત્કાલિક અસરથી મુખ્ય કંટ્રોલ-રૂમ (હેડક્વૉર્ટર) ખાતે ટ્રાન્સફર કરી દીધા છે. આ ઉપરાંત વિભાગમાં ફરજ બજાવતા ૨૭ ટ્રાફિક-વૉર્ડનની પણ બદલી કરી દેવામાં આવી છે. હાલમાં મુંબ્રા ટ્રાફિક પેટા-વિભાગના ઇન્સ્પેક્ટર પદનો વધારાનો હવાલો વહીવટી વિભાગના ઇન્સ્પેક્ટર ગૌરી મોરેને સોંપવામાં આવ્યો છે.

આ સમગ્ર ઘટનાની વિગત મુજબ ૨૫ ઑક્ટોબરે મુંબ્રા બાયપાસ રોડ પર જૂના બંધ ટોલનાકા પાસે મુંબ્રા ટ્રાફિક-વિભાગના અધિકારીઓ દ્વારા દારૂ પીને વાહન ચલાવનારા એક ડ્રાઇવર વિરુદ્ધ કાર્યવાહી કરીને તેનું લાઇસન્સ જપ્ત કરવામાં આવ્યું હતું. ત્યાર બાદ આ વાહનચાલકે થાણે કોર્ટમાં ૧૦ હજાર રૂપિયાનો દંડ ભર્યો હતો. દંડ ભર્યાની પાવતી લઈને જ્યારે ફરિયાદી પોતાનું લાઇસન્સ પરત લેવા મુંબ્રા ટ્રાફિક-વિભાગની કચેરીએ પહોંચ્યા ત્યારે ત્યાં સાદા કપડાંમાં હાજર રહેલા ૨૭ વર્ષના ટ્રાફિક-વૉર્ડન અરબાઝ શેખે લાઇસન્સ પરત આપવા માટે તેમની પાસે પાંચ હજાર રૂપિયાની લાંચની માંગણી કરી હતી.



વાહન-ડ્રાઇવરે આ અંગે ACBમાં ફરિયાદ નોંધાવતાં અધિકારીઓએ તેની ખરાઈ કરી હતી, જેમાં લાંચ માગવામાં આવી હોવાનું સ્પષ્ટ થયું હતું. ત્યાર બાદ ACBએ છટકું ગોઠવીને ટ્રાફિક-વૉર્ડન અરબાઝ શેખને લાંચ લેતા રંગેહાથ ઝડપી પાડ્યો હતો. આ ગંભીર બાબતની નોંધ લઈને થાણેના જૉઇન્ટ પોલીસ-કમિશનર ડૉ. જ્ઞાનેશ્વર ચવ્હાણે આ મોટી કાર્યવાહી કરી છે. થાણે ટ્રાફિક કંટ્રોલ બ્રાન્ચના ડેપ્યુટી પોલીસ-કમિશનર (DCP) પંકજ શિરસાટે જણાવ્યું હતું, ‘આ સમગ્ર લાંચ પ્રકરણની ઊંડાણપૂર્વક તપાસ ચાલી રહી છે, જેના ભાગરૂપે નિષ્પક્ષ તપાસ માટે તમામ અધિકારીઓ, કર્મચારીઓ અને વૉર્ડનની બદલી કરવામાં આવી છે.’


Whatsapp-channel Whatsapp-channel

22 November, 2026 08:16 AM IST | Mumbai | Gujarati Mid-day Correspondent

App Banner App Banner

અન્ય લેખો


This website uses cookie or similar technologies, to enhance your browsing experience and provide personalised recommendations. By continuing to use our website, you agree to our Privacy Policy and Cookie Policy. OK