પાકિસ્તાની ગૅન્ગસ્ટર સાથે કનેક્શનની શંકાએ મુંબઈમાં ૪૦ ઠેકાણે ATS ત્રાટકી

શહઝાદ ભટ્ટી વિદેશમાં રહીને ભારતના યુવાનોને ઉશ્કેરતો હોવાની બાતમી

પાકિસ્તાની ગૅન્ગસ્ટર શહઝાદ ભટ્ટી.

મહારાષ્ટ્રની ઍન્ટિ-ટેરરિઝમ સ્ક્વૉડ (ATS) દ્વારા બુધવારે મુંબઈ સહિત આખા મહારાષ્ટ્રમાં ૪૦ સ્થળે દરોડા પાડીને પાકિસ્તાનસ્થિત ગૅન્ગસ્ટર સાથે સંબંધ ધરાવતા શંકાસ્પદોની પૂછપરછ કરવામાં આવી હતી. ATSના આ ઑપરેશન દરમ્યાન ૪૦ શંકાસ્પદોની સઘન પૂછપરછ કરવામાં આવી હોવાની માહિતી એક અધિકારીએ આપી હતી. પાકિસ્તાનના ગૅન્ગસ્ટર શહઝાદ ભટ્ટી અને તેની 
સિન્ડિકેટ સાથે આ શંકાસ્પદો સંપર્કમાં હોવાની બાતમી મળતાં આ કાર્યવાહી કરવામાં આવી હતી.

ATSના એક અધિકારીએ જણાવ્યું હતું કે ‘શહઝાદ ભટ્ટી વિદેશમાં રહીને પોતાની ગૅન્ગ ચલાવે છે અને ભારતના યુવાનોને અસામા​જિક પ્રવૃત્તિઓમાં સામેલ થવા માટે ઉશ્કેરતો હોવાની શંકા છે. વહેલી સવારે મુંબઈ, અકોલા, નાંદેડ, પુણે, મીરા રોડ, નાલાસોપારા, નાશિક, જળગાવ, નાગપુર ઉપરાંત રાજ્યના અન્ય વિસ્તારોમાં દરોડા પાડવામાં આવ્યા હતા.’