૨૦૩૫ સુધીમાં મહારાષ્ટ્રને અગ્રણી ઇનોવેશન હબ બનાવવા માટે રાજ્ય સરકાર કયાં અસરકારક પગલાં લઈ શકે છે એ વિષય પર યુવાનોના આઇડિયા માગ્યા
ફાઇલ તસવીર
મહારાષ્ટ્રના મુખ્ય પ્રધાન દેવેન્દ્ર ફડણવીસે સોમવારે ધ ગવર્નન્સ ચૅલેન્જ 2026 (TGC) લૉન્ચ કરી હતી. આ પહેલ હેઠળ તેમણે દેશના તેજસ્વી યુવાનોને રાજ્યના વિકાસ અને અેને વધુ મજબૂત બનાવવાની પ્રક્રિયામાં સક્રિયપણે જોડાવા આહ્વાન કર્યું છે.
મુખ્ય પ્રધાન ફડણવીસે સોશ્યલ મીડિયા પ્લૅટફૉર્મ પર એક પોસ્ટ કરીને આ વિશે માહિતી આપતાં જણાવ્યું હતું કે ‘દેશની અગ્રણી બિઝનેસ સ્કૂલો અને પબ્લિક પૉલિસી ઇન્સ્ટિટ્યુશનના તેજસ્વી યુવા માનસને મહારાષ્ટ્રની ઇનોવેશન ઇકોસિસ્ટમને મજબૂત કરવા તથા રાજ્યને એક અગ્રણી ઇનોવેશન હબ તરીકે સ્થાપિત કરી શકે અેવા આઇડિયા સાથે આમંત્રણ આપવામાં આવે છે.’
નોંધનીય છે કે મહારાષ્ટ્ર સરકારના યજમાનપદે અને ‘સમગ્ર’ સંસ્થા દ્વારા આયોજિત ધ ગવર્નન્સ ચૅલેન્જની આ ચોથી આવૃત્તિ છે. આ વર્ષની સ્પર્ધામાં ભાગ લેનારા સ્પર્ધકો સામે મુખ્ય વિષય અને પ્રશ્ન મૂકવામાં આવ્યો છે કે વર્ષ ૨૦૩૫ સુધીમાં મહારાષ્ટ્રને એક અગ્રણી ‘ઇનોવેશન હબ’ બનાવવા માટે રાજ્ય સરકાર કયાં અસરકારક પગલાં લઈ શકે છે?’ આ પડકાર દ્વારા યુવાનોના નવીન વિચારો અને સૂચનોને સરકારી નીતિઓમાં સ્થાન આપવાનો મુખ્ય હેતુ છે.
