ઈ-ચલાન અસલી માલિકને મળતાં ક્લોન રિક્ષાનો ભેદ ઉકેલાયો
એક જ રજિસ્ટ્રેશન નંબર સાથે ચાલતી બે રિક્ષા
ઘોડબંદર રોડ પર રિક્ષામાં લઈ જવાઈ રહેલા બકરાને લીધે બનાવટી રજિસ્ટ્રેશન નંબર સાથે ચાલતી રિક્ષાનો ભાંડો ફૂટ્યો હતો. ટ્રાફિક-પોલીસે આપેલી માહિતી મુજબ ઘોડબંદર રોડ પર ઊભેલી એક રિક્ષામાં પૅસેન્જરોને બદલે એક મોટો બકરો લઈ જવાઈ રહ્યો હતો. ટ્રાફિક-પોલીસને પૂછપરછ દરમ્યાન આ બકરો ગેરકાયદે રીતે લઈ જવાઈ રહ્યો હોવાનું જણાતાં MH 04 HZ 4290 નંબરની આ રિક્ષા માટે ઈ-ચલાન આપ્યું હતું.
જોકે ઈ-ચલાન મુંબ્રામાં રહેતા રિક્ષાના માલિકને પહોંચ્યું હતું. ઈ-ચલાનનો મેસેજ મળતાં જ ડૉક્યુમેન્ટ્સ સાથે રિક્ષાનો માલિક તીન હાથ નાકા રિક્ષા લઈને પહોંચ્યો હતો. ત્યારે રીજનલ ટ્રાન્સપોર્ટ ઑફિસ (RTO)માં બે સરખા નંબરવાળી રિક્ષા જોતાં ટ્રાફિક-અધિકારીઓ સામે નકલી રજિસ્ટ્રેશન નંબર સાથે ક્લોન કરેલી રિક્ષાનો ભાંડો ફૂટ્યો હતો.
ADVERTISEMENT
શૅસિ-નંબર અને રજિસ્ટ્રેશનની ડીટેલ્સ ચેક કરતાં બકરાને લઈ જતી રિક્ષા સંપૂર્ણપણે ક્લોન થયેલી એટલે કે નકલી હોવાની જાણ થઈ હતી.
ટ્રાફિક ડિપાર્ટમેન્ટે તાત્કાલિક નકલી રિક્ષા જપ્ત કરીને રિક્ષા-ડ્રાઇવર વિરુદ્ધ નૌપાડા પોલીસ-સ્ટેશનમાં કેસ નોંધ્યો હતો.
