આરોપી પોતાની પત્ની તેની સાથે રહેવા તૈયાર ન હોવાથી ગુસ્સે ભરાયો હતો
વાઇરલ થયેલા વિડિયોમાં જોવા મળેલો આરોપી.
અંધેરી-ઈસ્ટના મરોલમાં આરાધ્યા હૉસ્પિટલ નજીક શુક્રવારે સાંજે ૪૬ વર્ષના રાજેશ છત્રેએ તેની પત્નીની ઘરેલુ ઝઘડા બાદ છરી વડે હત્યા કરી હતી. આ મામલે MIDC પોલીસે હત્યાના આરોપસર રાજેશની ધરપકડ કરીને વધુ તપાસ હાથ ધરી છે. આરોપીએ પત્ની સાથે વિવાદ કર્યા બાદ ઉશ્કેરાઈને તેને પેટ અને શરીરના અન્ય ભાગો પર છરીના ઘા ઝીંકી દીધા હતા. રસ્તા પર બનેલી એ ઘટનાનો વિડિયો સોશ્યલ મીડિયા પર વાઇરલ થયો છે.
MIDCના એક સિનિયર પોલીસ-અધિકારીએ ‘મિડ-ડે’ને કહ્યું હતું કે ‘આરોપી પોતાની પત્ની તેની સાથે રહેવા તૈયાર ન હોવાથી ગુસ્સે ભરાયો હતો. બન્ને વચ્ચે થયેલી જોરદાર બોલાચાલી દરમ્યાન રાજેશે પત્નીને એક હાથથી પકડીને હું તને છોડવાનો નથી એવી ધમકી આપીને તેને છરીના અનેક ઘા ઝીંકી દીધા હતા. ગંભીર રીતે ઘાયલ થયેલી મહિલાને બચાવી શકાઈ નહોતી. અમે ઘટનાસ્થળ પરથી ગુનામાં વપરાયેલી છરી જપ્ત કરી છે. પવઈમાં રહેતા રિક્ષા-ડ્રાઇવર રાહિલ લોકહાંડેએ એ ઘટના જોઈ હતી અને તેની ફરિયાદના આધારે અમે ગુનો નોંધ્યો છે. એ ઉપરાંત ઘટનાનો વિડિયો પણ જોવા મળ્યો છે જેમાં આરોપી છરી હાથમાં લઈને જતો જોવા મળી રહ્યો છે.’
