મુંબઈના પોલીસ-કમિશનર દેવેન ભારતીની ચેતવણી
પોલીસ-કમિશનર દેવેન ભારતી
મુંબઈમાં ડિસ્ક જૉકી (DJ) અને લેઝર લાઇટ જેવાં સાધનોના ઉપયોગ પર મૂકવામાં આવેલી બંધી કાયમ રાખવામાં આવી છે એમ જણાવીને મુંબઈના પોલીસ-કમિશનર દેવેન ભારતીએ કહ્યું હતું કે સુપ્રીમ કોર્ટ અને સરકારે નક્કી કરેલી નિર્ધારિત નૉઇસ-લિમિટનું ઉલ્લંઘન કરનાર સામે ગુનો નોંધવામાં આવશે. મુંબઈ પોલીસ સાથે તાજેતરમાં જ સાર્વજનિક ગણેશોત્સવ સમન્વય સમિતિની બેઠક યોજાઈ હતી જેમાં આ મુદ્દે ચર્ચા કરવામાં આવી હતી. એ પછી DJ અને લેઝર લાઇટ જેવાં સાધનોના ઉપયોગ પર બંધી મૂકવાનો નિર્ણય એકમતે લેવાયો હતો. એની સાથે ગણેશ મંડળોને નૉઇસ-પૉલ્યુશન સહિત અન્ય નિયમોની જાણકારી અપાઈ હતી અને પોલીસને સહકાર આપવાની અરજ કરી હતી.
આ બેઠકમાં હાજર રહેલા ગણેશ મંડળોના પ્રતિનિધિઓએ ખાતરી આપી હતી કે તેમના દ્વારા DJ અને લેઝર લાઇટ જેવાં સાધનોના ઉપયોગ કરવામાં આવશે નહીં. શાંતિપૂર્વક અને નિયમ અનુસાર તહેવારની ઉજવણીના સંદર્ભે આ નિર્ણય બહુ જ મહત્ત્વનો મનાઈ રહ્યો છે. મુંબઈમાં તહેવારોમાં શાંતિ અને વ્યવસ્થા જાળવવા પોલીસ-પ્રશાસન અને ગણેશોત્સવ સમિતિનું કો-ઑર્ડિનેશન મહત્ત્વનું ઠર્યું છે. એને કારણે ગણેશોત્સવ વધુ સેફ અને સારી રીતે ઊજવવામાં મદદરૂપ થશે એવી અપેક્ષા વ્યક્ત કરાઈ રહી છે. મુંબઈમાં અનેક તહેવારોની ઉજવણી થાય છે, પણ નૉઇસ-પૉલ્યુશનના અને અન્ય નિયમોનું યોગ્ય રીતે પાલન થાય એ માટે પોલીસ-પ્રશાસન હંમેશાં તત્પર હોય છે.
