ચાલતી ટ્રેનમાં દારૂના નશામાં જોખમી સ્ટન્ટ કરવામાં બન્ને પગ ગુમાવ્યા

આ ઘટનાએ સ્ટેશન પર હાજર લોકોમાં ચિંતા અને ભયનું વાતાવરણ ઊભું કર્યું હતું

પ્રતીકાત્મક તસવીર

થાણે રેલવે-સ્ટેશન પર એક ચોંકાવનારી ઘટના સામે આવી છે. પુણેથી આવતી મેલ ટ્રેનમાં મુસાફરી દરમ્યાન એક યુવાને મંગળવારે રાતે જોખમી સ્ટન્ટ કરવાનો પ્રયાસ કર્યો હતો, પરંતુ તેનું સંતુલન બગડતાં તે સીધો પ્લૅટફૉર્મ અને ટ્રેન વચ્ચેના ગૅપમાં પડી ગયો હતો. ઘટના એટલી ભયાનક હતી કે સ્ટેશન પર હાજર મુસાફરોમાં હાહાકાર મચી ગયો હતો. પ્રાથમિક માહિતી અનુસાર યુવક દારૂના નશામાં હતો અને બેદરકારીપૂર્વક ટ્રેનના દરવાજા પાસે જોખમી હિલચાલ કરી રહ્યો હતો. થાણે GRPએ જણાવ્યું હતું કે ‘ટ્રેન ધીમે-ધીમે પ્લૅટફૉર્મ-નંબર ૧૦ પર પ્રવેશી રહી હતી ત્યારે યુવક સ્ટન્ટ કરવા માટે દરવાજા પાસે લટક્યો હતો. અચાનક તેનો પગ સરકતાં તે નીચે પટકાયો હતો અને ગંભીર રીતે જખમી થયો હતો. દુર્ભાગ્યે અકસ્માત એટલો ગંભીર હતો કે યુવકે પોતાના બન્ને પગ ગુમાવ્યા છે. આ ઘટનાએ સ્ટેશન પર હાજર લોકોમાં ચિંતા અને ભયનું વાતાવરણ ઊભું કર્યું હતું.’