સ્માર્ટ ફોન હોવા છતાં ટૅબની શું જરૂર એવો વિપક્ષનો સવાલ
બીએમસી હેડક્વૉર્ટર
બૃહન્મુંબઈ મ્યુનિસિપલ કૉર્પોરેશન (BMC) દ્વારા સામાન્ય સભા તેમ જ વિવિધ વૈધાનિક સમિતિઓની કામગીરીને ડિજિટલ બનાવવાની દિશામાં એક મહત્ત્વપૂર્ણ પ્રસ્તાવ મૂકવામાં આવ્યો છે. આ પહેલ અંતર્ગત ૧૦ નામાંકિત સભ્યો સહિત તમામ ૨૩૭ કૉર્પોરેટરોને ૧૩ ઇંચના ટૅબ્લેટ પૂરા પાડવાની યોજના ઘડી કાઢવામાં આવી છે. BMC હવે કાગળ
પરનો વ્યવહાર સંપૂર્ણપણે બંધ કરવાનો ઇરાદો ધરાવે છે.
BMCમાં શાસક પક્ષ ભારતીય જનતા પાર્ટી (BJP) દ્વારા રજૂ કરવામાં આવેલા આ પ્રસ્તાવ સામે વિપક્ષે આકરા પ્રહારો કર્યા છે. શિવસેના (UBT)ના નેતા અને મુંબઈનાં ભૂતપૂર્વ મેયર કિશોરી પેડણેકરે સવાલ ઉઠાવતાં જણાવ્યું હતું કે જ્યારે મોટા ભાગના કૉર્પોરેટરો પાસે પહેલેથી જ સ્માર્ટ ફોન ઉપલબ્ધ છે તો પછી અલગથી નવાં ઉપકરણો ખરીદવાની શી જરૂર છે? તેમણે ઉમેર્યું હતું કે આજે લગભગ દરેક કૉર્પોરેટર પાસે સ્માર્ટ ફોન છે. BMCનો એજન્ડા તેમના ફોન પર ખૂબ જ સરળતાથી જોઈ શકાય છે. પ્રજાના કરવેરાનાં નાણાં આ રીતે અલગથી ટૅબ્લેટ ખરીદવા પાછળ વેડફવાની કોઈ આવશ્યકતા નથી.
બીજી તરફ, BMCના BJPના નેતા ગણેશ ખાનકરે આ નિર્ણયનો બચાવ કરતાં જણાવ્યું હતું કે આ પહેલનો મુખ્ય ઉદ્દેશ્ય BMCની કામગીરીને ધીમે-ધીમે સંપૂર્ણપણે પેપરલેસ સિસ્ટમ તરફ આગળ ધપાવવાનો છે. આ ટૅબ્લેટની મદદથી કૉર્પોરેટરો ગૃહ તેમ જ વિવિધ કમિટીઓની બેઠકોના એજન્ડા, પ્રસ્તાવો અને અેને સંબંધિત મહત્ત્વના દસ્તાવેજો ડિજિટલ સ્વરૂપે સહેલાઈથી મેળવી શકશે.
