કેમ્બ્રિજ યુનિવર્સિટી પ્રત્યે આદર દર્શાવવા માટે મોટા ભાગે લાઇટ બ્લુ રંગની પાઘડી પહેરતા
ડૉ. મનમોહન સિંહ
ડૉ. મનમોહન સિંહ હંમેશાં લાઇટ બ્લુ રંગની પાઘડી પહેરતા હતા અને બ્લુ તેમનો ફેવરિટ રંગ પણ હતો. આ જ કારણે તેઓ આ રંગની જ પાઘડી પહેરતા હતા. જોકે આ રંગ કેમ્બ્રિજ યુનિવર્સિટીનો પણ રંગ માનવામાં આવે છે અને આ મુદ્દે ડૉ. મનમોહન સિંહે એક વાર એક સમારોહમાં જણાવ્યું હતું કે કેમ્બ્રિજ યુનિવર્સિટીમાં વિતાવેલા તેમના દિવસોની યાદો ઘણી ઊંડી છે, આ બ્લુ રંગની પાઘડી યુનિવર્સિટી પ્રત્યે આદર અને સન્માન દર્શાવે છે.
કેમ્બ્રિજ યુનિવર્સિટીમાંથી તેમણે માસ્ટર્સની ડિગ્રી મેળવી હતી. ૨૦૦૬માં કેમ્બ્રિજ યુનિવર્સિટીએ તેમને ડૉક્ટર ઑફ લૉની ડિગ્રી આપીને સન્માનિત કર્યા હતા. આ સન્માન સમારોહમાં તત્કાલીન ડ્યુક ઑફ એડિનબર્ગ અને યુનિવર્સિટીના ચાન્સેલર પ્રિન્સ ફિલિપે તેમની બ્લુ રંગની પાઘડી પ્રત્યે ધ્યાન દોર્યું હતું. એ સમયે આ રહસ્ય ખોલતાં ડૉ. મનમોહન સિંહે જણાવ્યું હતું કે ‘હું જ્યારે કેમ્બ્રિજમાં અભ્યાસ કરતો હતો ત્યારે કાયમ બ્લુ રંગની જ પાઘડી પહેરતો હતો. આના કારણે મારા મિત્રો પણ મને બ્લુ ટર્બન નામથી બોલાવતા હતા અને એ મારું ઉપનામ પડી ગયું હતું. કૉલેજના દિવસોમાં આ રંગનો સાથ રહ્યો હતો જે પછી વડા પ્રધાનની ઑફિસ સુધી રહ્યો હતો. આ મારો ફેવરિટ રંગ છે અને કેમ્બ્રિજમાં વિતાવેલા દિવસોએ મારા પર ઊંડી છાપ છોડી છે.’
