ભારતીય યુવાને ૭ જ્વાળામુખી શિખરો માત્ર ૯૨ દિવસમાં સર કર્યાં, ગિનેસ વર્લ્ડ રેકૉર્ડ‍્સમાં સ્થાન મળ્યું

ભૂપતિરાજુ અનમિશ વર્માએ ૨૦૨૪ની ૨૩ ઑક્ટોબરે રશિયાના માઉન્ટ એલ્બ્રસથી શરૂ કરીને ૯૨ દિવસ, ૪ કલાક અને ૪૫ મિનિટમાં ૭ ખંડો પરના દરેક સૌથી ઊંચા જ્વાળામુખી પર ચડાણ કર્યું હતું

રશિયાના માઉન્ટ એલ્બર્સ પર ભૂપતિરાજુ અનમિશ વર્મા, ૭ જ્વાળામુખી શિખરો સૌથી ઓછા સમયમાં સર કરવાનો ગિનેસ વર્લ્ડ રેકૉર્ડ સ્વીકારતો ભૂપતિરાજુ અનમિશ વર્મા

વિશાખાપટનમના વતની ભૂપતિરાજુ અનમિશ વર્માએ ૭ જ્વાળામુખી શિખરો સૌથી ઝડપી સમયમાં સર કરવાનો ગિનેસ વર્લ્ડ રેકૉર્ડ બનાવ્યો છે. તેણે ૨૦૨૪ની ૨૩ ઑક્ટોબરે રશિયાના માઉન્ટ એલ્બ્રસથી શરૂ કરીને ૯૨ દિવસ, ૪ કલાક અને ૪૫ મિનિટમાં ૭ ખંડો પરના દરેક સૌથી ઊંચા જ્વાળામુખી પર ચડાણ કર્યું હતું. તેણે ૨૦૨૫ની ૨૩ જાન્યુઆરીએ ઍન્ટાર્કટિકા માઉન્ટ સિડલી ખાતે છેલ્લું શિખર સર કર્યું હતું. ૨૦૨૬ની ૬ ફેબ્રુઆરીએ ગિનેસ વર્લ્ડ રેકૉર્ડ્‍સે આ સિદ્ધિની સત્તાવાર પુષ્ટિ કરી હતી.

વૉલ્કેનિક સેવન સમિટ પર્વતારોહણની દુનિયામાં સૌથી પડકારજનક પડકારોમાંનો એક માનવામાં આવે છે. એમાં દરેક ખંડ પરના સૌથી ઊંચા જ્વાળામુખી પર ચડવું પડે છે. એ માત્ર શારીરિક શક્તિ જ નહીં પરંતુ માનસિક સહનશક્તિ, તકનીકી કુશળતા અને હવામાન સ્થિતિસ્થાપકતાની પણ કઠિન કસોટી છે. ભૂપતિરાજુએ વિશ્વના સૌથી ઊંચા શિખર માઉન્ટ એવરેસ્ટ પર ભારતીય ધ્વજ પણ ફરકાવ્યો છે જે કોઈ પણ પર્વતારોહક માટે સૌથી મોટી સિદ્ધિઓમાંની એક માનવામાં આવે છે.

ADVERTISEMENT

૧૭ માર્ચે દિલ્હીના વિનય માર્ગ પર આવેલા સિવિલ સર્વિસિસ ઑફિસર્સ ઇન્સ્ટિટ્યૂટ (CSOI) ખાતે એક ખાસ સમારોહમાં ભૂપતિરાજુને તેના ઐતિહાસિક રેકૉર્ડ માટે સન્માનિત કરવામાં આવ્યા હતા. ગિનેસ વર્લ્ડ રેકૉર્ડ્‍સ ટીમના પ્રતિનિધિ ઋષિ નાથે તેને સત્તાવાર પ્રમાણપત્ર આપ્યું હતું.