ભૂખ્યાં વરુઓને ખોરાક પૂરો પાડતા રહેવાનું કુદરતનું રિમાઇન્ડર એટલે વુલ્ફ મૂન : આગામી ત્રણ દિવસ સુધી સુપરમૂન જોઈ શકાશે
ગઈ કાલનો સુપરમૂન
ઈશુના નવા અંગ્રેજી વર્ષ ૨૦૨૬નું આગમન થઈ ચૂક્યું છે અને નૂતન વર્ષના આકાશને વધાવવા આજે પોષી પૂનમના દિવસે નભોમંડળમાં વુલ્ફ મૂનનો રોમાંચક નજારો જોવા મળશે.
આ વરુ ચંદ્ર દરમ્યાન સતત ત્રણ દિવસ સુધી પૂર્ણ ચંદ્ર તરીકે જોઈ શકાશે.
સામાન્ય રીતે જાન્યુઆરીના આ દિવસો દરમ્યાન સંખ્યાબંધ સ્થળોએ બરફનાં તોફાનો સર્જાતાં હોય છે જેને કારણે વરુઓ ખોરાકના અભાવે ભૂખથી ટળવળતાં હોય છે. આ ભૂખ્યાં વરુઓને ખોરાક પૂરો પાડતા રહેવાની ‘અલર્ટ’ તરીકે આ ચંદ્રમાને વુલ્ફ મૂન નામ અપાયું છે. વુલ્ફ મૂન પૃથ્વીથી એ ભ્રમણકક્ષામાં પ્રમાણમાં નજીક રહેતો હોવાથી એ એકદમ ઝળહળતો, કદમાં મોટો અને નજીક હોય એવો દેખાય છે. આ વખતે આ સુપરમૂન શનિવારે ઉદય પામશે અને એની અસર હેઠળ શુક્રવારથી જ ચંદ્રનું તેજ વધી ગયું છે. આ વખતે ચંદ્ર સુપરમૂન હશે અને એ ગુરુના ગ્રહ પરથી પસાર થશે એને કારણે એક અદ્ભુત માહોલ સર્જાશે.
ADVERTISEMENT
દુનિયાભરના ખગોળરસિકો આ વુલ્ફ-ચંદ્ર જોવા તલપાપડ બન્યા છે.
હવે પછી આવો સુપરમૂન નવેમ્બર ૨૦૨૬માં જોવા મળશે. આજે ચંદ્ર એની ભ્રમણકક્ષામાં પૃથ્વીથી સામાન્ય કરતાં લગભગ ૧૦,૦૦૦ કિલોમીટર નજીક રહેશે જેથી એ ૧૪ ટકા કદમાં મોટો અને ૩૦ ટકા વધુ પ્રકાશિત જોવા મળશે.
પોષી પૂનમનો દિવસ, માતા અંબાના પ્રાગટ્ય દિન તરીકે ઊજવાય છે.
ઉલ્લેખનીય છે કે મિત્ર-ખેડૂતોની ટોળકીએ પૂનમના ચંદ્રને છેક ઈ. સ ૧૯૩૦થી જુદાં-જુદાં નામ આપવાનું શરૂ કર્યું હતું અને જાન્યુઆરીના પૂર્ણ ચંદ્રને વુલ્ફ મૂન નામ અપાયું હતું. યુરોપના દેશોમાં આ ચંદ્રને આઇસ મૂન અથવા ઓલ્ડ મૂન તરીકે પણ ઓળખાય છે.
આ ઉપરાંત આ પૂર્ણ ચંદ્ર થિરરુવથીરાય ઉત્સવ તરીકે પણ ઊજવાય છે અને આ ઉત્સવ કેરલા અને તામિલનાડુમાં રહેતા હિન્દુઓ ખાસ ઊજવે છે. પોષી પૂનમને શ્રીલંકામાં દુરુથુપોયા તરીકે પણ ઓળખવામાં આવે છે. આ દિવસે ભગવાન બુદ્ધે શ્રીલંકાની પ્રથમ વખત મુલાકાત લીધી હતી.
આ દિવસે વુલ્ફ મૂન જોવાનો લહાવો લેવાનું ચૂકતા નહીં.
