ચાર વિકેટ ઝડપી નૅથન એલિસ બન્યો મૅચનો હીરો, ૨૮ વર્ષ બાદ કાંગારૂઓેને આજે વન-ડે સિરીઝ જીતવાની તક...
નૅથન એલિસે ૩૩ રનમાં ચાર વિકેટ સાથે તરખાટ મચાવ્યો હતો
શનિવારે રાવલપિંડીમાં પ્રથમ વન-ડેમાં પાકિસ્તાન સામે પાંચ વિકેટથી હાર્યા બાદ મંગળવારે લાહોરમાં બીજી વન-ડે ૪૧ રનથી જીતીને ઑસ્ટ્રેલિયાએ શાનદાર કમબૅક કર્યું હતું. ૧-૧થી બરોબરી બાદ ત્રીજી અને નિર્ણાયક વન-ડે આજે લાહોરમાં રમાશે.
મંગળવારે પાકિસ્તાને ટૉસ જીતીને ઑસ્ટ્રેલિયાને પ્રથમ બૅટિંગ માટે આમંત્રણ આપ્યું હતું. ઑસ્ટ્રેલિયાએ મૅચના પહેલા જ બૉલે ઍલેક્સ કૅરીની વિકેટ ગુમાવ્યા બાદ કૅપ્ટન જૉશ ઇંગ્લિસ અને કૅમરન ગ્રીનની હાફ સેન્ચુરીને લીધે ૫૦ ઓવરમાં ૯ વિકેટે સન્માજનક ૨૩૧ રન બનાવ્યા હતા. પાકિસ્તાન પહેલી જ ઓવરથી નિરંતર વિકેટ ગુમાવતું રહીને ૧૭મી ઓવરમાં ૭૮ રનમાં ૬ વિકેટ જેવી દયનીય સ્થિતિમાં પહોંચી ગયું હતું. શાદાબ ખાન (૧૦૪ બૉલમાં ૭૨) અને બીજી જ વન-ડે રમી રહેલા અરફાત મિન્હાસે (૪૩ બૉલમાં ૩૩ રન) થોડો સમય પ્રતિકાર કર્યો હતો પણ તેઓ મૅન ઑફ ધ મૅચ નૅથન એલિસના તરખાટ સામે ૪૪મી ઓવરમાં ઑલઆઉટ થઈ ગયા હતા. નૅથન એલિસે ૯ ઓવરમાં એક મેઇડન નાખીને ૩૩ રનમાં ૪ વિકેટ લીધી હતી. બાબર આઝમ ૧૬ બૉલમાં બે ફોર સાથે ૧૬ રન જ બનાવી શક્યો હતો.
ત્રીજી અને નિર્ણાયક વન-ડે આજે લાહોરમાં જ રમાશે. ઑસ્ટ્રેલિયા છેલ્લે પાકિસ્તાનમાં વન-ડે સિરીઝ ૧૯૯૮માં જીત્યું હતું, આમ ૨૮ વર્ષના લાંબા ઇન્તેજાર બાદ હવે વધુ એક વન-ડે સિરીઝ જીતવાનો મોકો છે. પાકિસ્તાન છેલ્લાં ૧૧ વર્ષમાં ઘરઆંગણે માત્ર એક જ વન-ડે સિરીઝ હાર્યું છે.
