ભારતીય ક્રિકેટ બોર્ડે મંગળવારે પૅનલમાં ખાલી પડેલા પદ માટે અરજીઓ મગાવી હતી જેની અંતિમ તારીખ ૧૪ ઑક્ટોબર નક્કી કરવામાં આવી છે.
ગૌતમ ગંભીર અને અજિત આગરકર
ભારતના હેડ કોચ ગૌતમ ગંભીરે સિલેક્શન પૅનલમાંથી ચીફ સિલેક્ટર અજિત આગરકરની વિદાય થતાં એક હૃદયસ્પર્શી સંદેશ શૅર કર્યો હતો. ૪ ઑક્ટોબરે સિનિયર ભારતીય ટીમની સિલેક્શન પૅનલમાંથી વિદાય લેનાર અજિત આગરકરની ટીમ-ફર્સ્ટની માનસિકતાનાં ગૌતમ ગંભીરે વખાણ કર્યાં હતાં.
ગૌતમ ગંભીરે સોશ્યલ મીડિયા પ્લૅટફૉર્મ X પર લખ્યું, ‘પ્રિય અજિતભાઈ, તારી સાથે કામ કરવું એ મારા માટે સૌભાગ્યની વાત હતી. એ ૩ ICC ટ્રોફી તારી અતૂટ દૃઢતાની સાક્ષી છે. ટીમ ફર્સ્ટ અને ટીમ હંમેશાં. મારે કહેવું જ પડશે કે ઇતિહાસ તારા પ્રત્યે ઉદાર રહેશે. દરેક વસ્તુ માટે આભાર. તારા ભવિષ્યના પ્રયાસો માટે મારી શુભેચ્છાઓ.’
ચીફ સિલેક્ટર તરીકેના અજિત આગરકરના કાર્યકાળમાં ભારતે ૨૦૨૪ અને ૨૦૨૬ના T20 વર્લ્ડ કપ અને ચૅમ્પિયન્સ ટ્રોફી 2025નું ટાઇટલ જીત્યું હતું. તેના કાર્યકાળમાં રોહિત શર્મા, વિરાટ કોહલી, રવીન્દ્ર જાડેજા, રવિચન્દ્રન અશ્વિન અને ચેતેશ્વર પુજારાએ અલગ-અલગ ફૉર્મેટમાંથી નિવૃત્તિ લીધી હતી.
ભારતનો ભૂતપૂર્વ સ્પિનર પ્રજ્ઞાન ઓઝા પૅનલના વચગાળાના અધ્યક્ષ તરીકે કામ કરી રહ્યો છે. આર.પી. સિંહ, શિવ સુંદર દાસ અને અજય રાત્રા તેના અન્ય સભ્યો છે. ભારતીય ક્રિકેટ બોર્ડે મંગળવારે પૅનલમાં ખાલી પડેલા પદ માટે અરજીઓ મગાવી હતી જેની અંતિમ તારીખ ૧૪ ઑક્ટોબર નક્કી કરવામાં આવી છે.
