રાંચીમાં આજે ભારત અને સાઉથ આફ્રિકા વચ્ચેની ત્રણ વન-ડે મૅચની સિરીઝનો પ્રારંભ થશે. સાઉથ આફ્રિકા સામે ટેસ્ટ-સિરીઝમાં ૦-૨થી કારમી હારનો સામનો કરનાર ભારતીય ટીમ આજથી ઘરઆંગણાનું ગૌરવ પાછું મેળવવાનો પ્રયાસ કરશે.
ગઈ કાલે રાંચીમાં પ્રૅક્ટિસ કરતા ભારતીય અને સાઉથ આફ્રિકન ક્રિકેટરો
ભારતના ભૂતપૂર્વ કૅપ્ટન મહેન્દ્ર સિંહ ધોનીના શહેર રાંચીમાં આજે ભારત અને સાઉથ આફ્રિકા વચ્ચેની ત્રણ વન-ડે મૅચની સિરીઝનો પ્રારંભ થશે. સાઉથ આફ્રિકા સામે ટેસ્ટ-સિરીઝમાં ૦-૨થી કારમી હારનો સામનો કરનાર ભારતીય ટીમ આજથી ઘરઆંગણાનું ગૌરવ પાછું મેળવવાનો પ્રયાસ કરશે. ટેસ્ટ-રિટાયરમેન્ટ બાદ રોહિત શર્મા અને વિરાટ કોહલી પહેલી વખત ઘરઆંગણે ઇન્ટરનૅશનલ મૅચ રમશે. રાંચીનું આ સ્ટેડિયમ હાઈ સ્કોરિંગ મેદાન રહ્યું છે. અહીં રમાયેલી કુલ છમાંથી ૪ મૅચમાં ૫૦૦ પ્લસ અને બે મૅચમાં ૩૦૦ પ્લસ રન બન્યા છે.
રાંચીના ઝારખંડ સ્ટેટ ક્રિકેટ અસોસિએશનના સ્ટેડિયમમાં ઑક્ટોબર ૨૦૨૨ બાદ પહેલી વખત વન-ડે ફૉર્મેટની મૅચ રમાશે. આ મેદાન પર ભારત ૬ વન-ડે મૅચ રમ્યું છે જેમાંથી ત્રણમાં જીત મળી છે અને બે મૅચમાં હાર્યું છે. ૨૦૧૩માં એક મૅચ નો-રિઝલ્ટ રહી હતી. ભારત-સાઉથ આફ્રિકા વચ્ચે ૨૦૨૨માં અહીં એકમાત્ર વન-ડે મૅચ રમાઈ હતી જેમાં ભારતે ૭ વિકેટે જીત મેળવી હતી. આ ફૉર્મેટ સિવાય સાઉથ આફ્રિકા ૨૦૧૯માં રાંચીમાં એક ટેસ્ટ-મૅચ રમ્યું હતું એમાં એક ઇનિંગ્સ અને ૨૦૨ રનની હારનો સામનો કરવો પડ્યો હતો જે એશિયામાં તેમની સૌથી મોટી હાર હતી.
