નાટક અને જીવન વિશે કેટલીક સમાનતા હોઈ શકે, પણ અસમાનતા એટલી બધી છે કે બધી સમાનતાનો છેદ ઉડાડી દે છે.
માણસ એક રંગ અનેક
પ્રવીણ સોલંકી
મોતની ક્ષણ ટળી ગઈ, જીવનને એક્સ્ટેન્શન મળ્યું એ સમાચાર મિત્રો-સંબંધીઓને આપવા માટે લેખ લખી તો નાખ્યો, પણ એનું પરિણામ જે આવ્યું એનાથી અમે બધાં કુટુંબીજનો સ્તબ્ધ થઈ ગયાં. અણધાર્યું અને અકલ્પ્ય. આવા ઘેરા પ્રત્યાઘાત પડશે એની તો કલ્પના જ નહોતી કરી. મુંબઈ, સુરત, વડોદરા, અમદાવાદ, કચ્છ, હૈદરાબાદ, કલકતા અને પરદેશથી પૂછપરછ, ફોન, ફરિયાદ અને ખબર-અંતર પૂછવાનો જે અણધાર્યો દોર શરૂ થયો એનાથી અમે સૌ ડઘાઈ ગયાં. સંબંધો, પ્રેમ-લાગણી, હૂંફનું મહત્ત્વ સમજાયું. કુટુંબ, મિત્રો, સગાંવહાલાં, આડોશી-પાડોશીઓ સાથેના હૂંફાળા સંબંધોનું માહાત્મ્ય સમજાયું.