તેલુગુ પરિવારની શ્રીલીલા માત્ર ૨૩ વર્ષની છે, પણ કન્નડા અને તેલુગુ ફિલ્મ-ઇન્ડસ્ટ્રીમાં તેણે જબરી જમાવટ કરી લીધી છે
‘પુષ્પા 2 : ધ રૂલ’ના આઇટમ સૉન્ગનું લીક થયેલું દૃશ્ય અને ગઈ કાલે કરવામાં આવેલી સત્તાવાર જાહેરાત.
‘પુષ્પા : ધ રાઇઝ’ના આઇટમ સૉન્ગ દ્વારા સમન્થા રુથ પ્રભુએ જે રીતે ધમાલ મચાવેલી એ રીતે ‘પુષ્પા 2 : ધ રૂલ’માં ધમાલ મચાવવા માટે તેલુગુ-કન્નડા ફિલ્મોની હિરોઇન શ્રીલીલાની પસંદગી કરવામાં આવી છે. જેની બેસબ્રીથી રાહ જોવાઈ રહી છે એ ‘પુષ્પા 2 : ધ રૂલ’માં શ્રીલીલા આઇટમ સૉન્ગ કરશે એવી ચર્ચા થોડા દિવસથી હતી જ, પણ ગઈ કાલે એની સત્તાવાર જાહેરાત કરી દેવામાં આવી છે. અલ્લુ અર્જુન અને રશ્મિકા મંદાનાની આ ફિલ્મ પાંચમી ડિસેમ્બરે રિલીઝ થવાની છે.
તેલુગુ પરિવારની શ્રીલીલા માત્ર ૨૩ વર્ષની છે, પણ કન્નડા અને તેલુગુ ફિલ્મ-ઇન્ડસ્ટ્રીમાં તેણે જબરી જમાવટ કરી લીધી છે. શ્રીલીલા આમ તો જન્મી અમેરિકામાં છે, પણ તેનો ઉછેર બૅન્ગલોરમાં થયો છે. બૅન્ગલોરમાં તેની મમ્મી ગાયનેકોલૉજિસ્ટ છે. શ્રીલીલાનો જન્મ થયો એ પહેલાં તેનાં મમ્મી-પપ્પા છૂટાં પડી ગયાં હતાં. શ્રીલીલા પણ ડૉક્ટર બનવા માગતી હતી, પણ ફિલ્મોના રવાડે ચડ્યા પછી તેનું એ ફોકસ બદલાઈ ગયું લાગે છે.
