બૉટલ ઓલ્ડ ફૅશન થઈ, હવે કૅપ્સ્યુલમાં મળી રહ્યું છે પરફ્યુમ

પરંપરાગત બૉટલ્સમાંથી મુક્તિ અપાવતું આ નવું ઇનોવેશન યુથમાં લોકપ્રિય બની રહ્યું છે.

કૅપ્સ્યુલમાં પરફ્યુમ

ફાસ્ટ લાઇફસ્ટાઇલની સાથે રોજિંદી જરૂરિયાતો પણ વધુ પોર્ટેબલ અને સ્માર્ટ બની રહી છે. એક સમય હતો જ્યારે લોકો ઘરમાંથી નીકળતી વખતે ભારે અને કાચની પરફ્યુમ બૉટલમાંથી સ્પ્રે કરતા અથવા તો ટ્રાવેલિંગ વખતે લીકેજ થવાના ડર સાથે બૉટલ કૅરી કરતા હતા, પણ બદલાતા સમયની સાથે હવે પૉકેટ પરફ્યુમ કૅપ્સ્યુલનો ટ્રેન્ડ આવ્યો છે. દેખાવમાં દવાની ગોળી કે કૅપ્સ્યુલ જેવી લાગતી આ નાની-નાની રચનાઓમાં હાઈ ક્વૉલિટી પરફ્યુમનું પૅકેજિંગ થાય છે. નાના અને સુઘડ બૉક્સમાં પૅક થઈને આવતી આ કૅપ્સ્યુલ યુઝર્સને અત્યંત સરળતા અને પ્રીમિયમ અનુભવ પૂરો પાડે છે.

કેવી રીતે કામ કરે?

ADVERTISEMENT

પૉકેટ પરફ્યુમ કૅપ્સ્યુલ ફ્રૅગ્રન્સ ટેક્નૉલૉજી અને મૉડર્ન પૅકેજિંગનું ઉત્કૃષ્ટ ઉદાહરણ છે. આ ખ્યાલ મુખ્યત્વે સૉલિડ અથવા અત્યંત કૉન્સન્ટ્રેટેડ પરફ્યુમ ઑઇલ આધારિત હોય છે. સામાન્ય રીતે બજારમાં મળતી આ કૅપ્સ્યુલ બાયોડિગ્રેડેબલ અથવા સુરક્ષિત જિલેટિનથી બનેલી હોય છે. એ જોવામાં નાની ગોળી જેવી જ લાગે છે. આ કૅપ્સ્યુલનો ઉપયોગ કરવો ખૂબ જ સરળ છે. જ્યારે પણ જરૂર પડે ત્યારે બૉક્સમાંથી એક કૅપ્સ્યુલ બહાર કાઢીને એને હળવેથી દબાવવાની હોય છે. એમાંથી નીકળતું એસેન્સ કે કૉન્સન્ટ્રેટેડ પરફ્યુમ કાંડા, ગરદન કે કપડા પર હળવા હાથે લગાવી શકાય છે. દરેક કૅપ્સ્યુલ એક વારના ઉપયોગ માટે પૂરતી માત્રા ધરાવે છે, જેનાથી પરફ્યુમનો બગાડ થતો નથી.

શા માટે બની રહ્યો છે પૉપ્યુલર?

પોર્ટેબિલિટી અને સ્પેસ સેવિંગ : પરંપરાગત સ્પ્રે બૉટલની સરખામણીમાં પૉકેટ પરફ્યુમ કૅપ્સ્યુલના ઘણા ફાયદા છે. વર્કિંગ પ્રોફેશનલ્સ મિનિમલિઝમમાં માને છે. નાના પૉકેટમાં, ક્લચમાં કે ટ્રાવેલ કિટમાં કાચની પરફ્યુમ બૉટલ મૂકવી શક્ય નથી હોતી; જ્યારે પરફ્યુમ કૅપ્સ્યુલ્સનું આખું બૉક્સ તમારા ખિસ્સામાં કે કી-ચેઇન જેવડી જગ્યામાં પણ સરળતાથી સમાઈ જાય છે.

લીકેજ અને તૂટવાનો શૂન્ય ડર : કાચની બૉટલ બૅગમાં ફૂટી જવી કે પરફ્યુમ લીક થઈને કપડાં બગડવાં એ બહુ સામાન્ય સમસ્યા છે. કૅપ્સ્યુલનું પૅકેજિંગ લીક-પ્રૂફ હોવાને કારણે પ્રવાસ, ફ્લાઇટ કે ડેઇલી કમ્યુટિંગ દરમ્યાન આ જોખમ સાવ ઘટી જાય છે. શિપિંગ કે ફ્લાઇટના રૂલ મુજબ પ્રવાહી પરનાં નિયંત્રણોમાં પણ આ કૅપ્સ્યુલ સરળતાથી પાસ થઈ જાય છે.

ઝીરો વેસ્ટેજ : ઘણી વાર સ્પ્રે બૉટલથી જરૂર કરતાં વધુ પરફ્યુમ છંટાઈ જતું હોય છે. કૅપ્સ્યુલમાં પરફ્યુમનું પ્રમાણ પહેલેથી જ માપેલું હોય છે. આથી જેટલી જરૂર હોય એટલો જ ઉપયોગ થાય છે અને કીમતી પરફ્યુમનો બગાડ અટકે છે.

લૉન્ગ લાસ્ટિંગ : મોટા ભાગની પરફ્યુમ કૅપ્સ્યુલમાં આલ્કોહૉલનું પ્રમાણ ઓછું અને એસેન્શિયલ ઑઇલ્સનું પ્રમાણ વધુ હોય છે. પરિણામે એ ત્વચા પર લાંબા સમય સુધી ટકી રહે છે અને ત્વચાને ડ્રાય થવા દેતું નથી.

સસ્ટેનેબિલિટીનો અભિગમ : જાગૃત ગ્રાહકો માત્ર પ્રોડક્ટનો ઉપયોગ નથી જોતા, એની પર્યાવરણ પર થતી અસર પણ ધ્યાનમાં લે છે. મોટા ભાગની બ્રૅન્ડ્સ આ કૅપ્સ્યુલ્સ બનાવવા માટે ઇકો-ફ્રેન્ડ્લી અને ડીગ્રેડેબલ મટીરિયલનો ઉપયોગ કરી રહી છે. આ ઉપરાંત પ્લાસ્ટિક નોઝલ કે સ્પ્રે મેકૅનિઝમ વગરની આ પ્રોડક્ટ પ્લાસ્ટિક વેસ્ટ ઘટાડવામાં પણ મદદરૂપ સાબિત થાય છે.

ભવિષ્યનું માર્કેટ

બ્યુટી અને પર્સનલ કૅર માર્કેટના નિષ્ણાતોના મતે ઑન-ધ-ગો એટલે કે ચાલતાં-ફરતાં ઉપયોગ કરી શકાય એવી પ્રોડક્ટ્સનું ભવિષ્ય ખૂબ જ ઉજ્જવળ છે. જિમ જતા લોકો, સતત બિઝનેસ ટ્રાવેલ કરતા પ્રોફેશનલ્સ, નાઇટ આઉટ કે ઇવેન્ટ્સમાં જતા યુવાનો માટે આ કૅપ્સ્યુલ ક્વિક ફ્રેશ-અપનું સાધન બની ગઈ છે. મેટ્રો સિટીઝમાં પણ આ કન્સેપ્ટ ઝડપથી અપનાવવામાં આવી રહ્યો છે. ઈ-કૉમર્સ પ્લૅટફૉર્મ્સ અને પ્રીમિયમ લાઇફસ્ટાઇલ સ્ટોર્સ પર આ કૅપ્સ્યુલ બૉક્સનું વેચાણ સતત વધી રહ્યું છે. આગામી સમયમાં વિવિધ સુગંધનાં વરાઇટી પૅક્સ અને પર્સનલાઇઝ્ડ ઑપ્શન્સ સાથે આ ટ્રેન્ડ ભારતીય માર્કેટમાં વધુ મજબૂત પકડ જમાવશે એવી શકયતા દેખાઈ રહી છે.