દુબઈમાં બેઠેલા પાકિસ્તાની માસ્ટરમાઇન્ડના ઇશારે આચર્યો ગુનો; બૅન્ગકૉકની હોટેલમાંથી પાંચ ભારતીયોની ધરપકડ
પ્રતીકાત્મક તસવીર
થાઇલૅન્ડમાં સસ્તા પ્રવાસન પૅકેજની લાલચ આપીને બોલાવાયેલા ત્રણ ભારતીય પ્રવાસીઓનું અપહરણ કરીને, એક અઠવાડિયા સુધી બંધક બનાવીને અમાનુષી અત્યાચાર ગુજારવાની ચોંકાવનારી ઘટના સામે આવી છે. બદમાશોએ પીડિતોના પરિવારજનો પાસે ૭૦ લાખ રૂપિયા (આશરે ૨.૪ મિલ્યન થાઇ બાથ)ની ખંડણીની માગણી કરી હતી. થાઇ પોલીસે સોમવારે સાંજે ત્રણેય યુવાનોને મુક્ત કરાવીને પાંચ ભારતીય આરોપીઓની ધરપકડ કરી છે.
તપાસ-અધિકારીઓના જણાવ્યા અનુસાર ૨૩થી ૨૬ વર્ષની વયના આ પ્રવાસીઓએ આશરે ૧,૯૯,૮૯૦ રૂપિયા (૭૦,૦૦૦ થાઇ બાથ) ચૂકવીને પૅકેજ લીધું હતું. ૨૧ જુલાઈઅે સુવર્ણભૂમિ ઍરપૉર્ટ પહોંચ્યા બાદ તેમને પટાયાના એક મકાનમાં બંધ કરી દેવાયા હતા. તેમના હાથ-પગ અને મોં બાંધીને ઊંધા લટકાવી ઢોર માર મારવામાં આવતો હતો તેમ જ ખાવા-પીવા કે શૌચાલય પણ જવા દેવાતા નહોતા.
ADVERTISEMENT
આ સમગ્ર કાવતરું દુબઈમાં બેઠેલા એક પાકિસ્તાની માસ્ટરમાઇન્ડ દ્વારા રચવામાં આવ્યું હતું. તેણે ડિજિટલ મની ટ્રાન્સફર દ્વારા ખંડણી વસૂલવાનું આયોજન કર્યું હતું. પોલીસે બૅન્ગકૉકના ક્લોંગ તાન વિસ્તારની હોટેલમાંથી અપહરણ કરનાર પાંચેય ભારતીયોને દબોચી લીધા છે, જ્યારે તેના પાકિસ્તાની સાથીદારો ફરાર છે.
