ફડણવીસ મંત્રીમંડળમાં નવી એન્ટ્રી, એનસીપીના નેતા છગન ભુજબળે રાજ ભવનમાં મંત્રી પદના શપથ લીધા

Maharashtra Cabinet: આજે સવારે મુંબઈમાં આવેલા રાજ ભવનમાં એનસીપીના નેતા છગન ભુજબળે મંત્રી પદના શપથ લીધા; ધનંજય મુંડેના રાજીનામા બાદ મહારાષ્ટ્ર કેબિનેટમાં એક પદ ખાલી હતું

મુંબઈમાં રાજભવન ખાતે શપથ લીધા પછી એનસીપી નેતા છગન ભુજબળે મીડિયાનું અભિવાદન કર્યું હતું (તસવીરઃ અતુલ કાંબળે)

આજે મહારાષ્ટ્ર કેબિનેટ (Maharashtra Cabinet)નો વિસ્તાર થયો છે. મંગળવારે મુંબઈ (Mumbai)ના રાજ ભવન (Raj Bhavan) ખાતે મહારાષ્ટ્ર સરકારમાં મંત્રી તરીકે રાષ્ટ્રવાદી કોંગ્રેસ પાર્ટી (Nationalist Congress Party - NCP)ના વરિષ્ઠ નેતા છગન ભુજબળ (Chhagan Bhujbal)એ શપથ લીધા. શપથ ગ્રહણ સમારોહમાં મહારાષ્ટ્રના મુખ્યમંત્રી દેવેન્દ્ર ફડણવીસ (Devendra Fadnavis), નાયબ મુખ્યમંત્રી એકનાથ શિંદે (Eknath Shinde) અને અજિત પવાર (Ajit Pawar) સહિત મહાયુતિ સરકાર (Mahayuti Government)ના અન્ય અગ્રણી મંત્રીઓ હાજર રહ્યા હતા.

મહારાષ્ટ્રમાં મંત્રીમંડળનું વિસ્તરણ કરવામાં આવ્યું છે. NCP નેતા છગન ભુજબળે મહારાષ્ટ્ર સરકારમાં મંત્રી તરીકે શપથ (Chhagan Bhujbal takes oath as Minister of Mahayuti Govt) લીધા છે. મુંબઈના રાજભવનમાં છગન ભુજબળનો શપથગ્રહણ સમારોહ યોજાયો હતો. NCP નેતા છગન ભુજબળને ફરી એકવાર મંત્રી બનવાની તક મળી છે. ધનંજય મુંડે (Dhannjay Munde)ના રાજીનામા બાદ મંત્રીમંડળમાં એક પદ ખાલી હતું. હવે આ પદ છગન ભુજબળને સોંપવામાં આવ્યું છે.

ADVERTISEMENT

રાજ્યના મુખ્યપ્રધાન દેવેન્દ્ર ફડણવીસે NCP નેતા છગન ભુજબળને મંત્રી તરીકે સામેલ કરીને તેમના પાંચ મહિના જૂના મંત્રીમંડળનું વિસ્તરણ કર્યું. શાસક મહાયુતિ ગઠબંધન દ્વારા આ વ્યૂહાત્મક પગલું ઓબીસી (OBC) સમુદાયમાં તેની સ્થિતિ મજબૂત બનાવવા અને રાજ્યમાં સરકારના પ્રતિનિધિત્વને મજબૂત બનાવવાનો છે.

મહારાષ્ટ્રના રાજ્યપાલ સી પી રાધાકૃષ્ણન (C P Radhakrishnan) દ્વારા રાજભવન ખાતે પીઢ રાજકારણી છગન ભુજબળને શપથ લેવડાવવામાં આવ્યા હતા.

મહારાષ્ટ્રના મંત્રી તરીકે શપથ લીધા પછી, NCP નેતા છગન ભુજબળે કહ્યું, ‘જેમ કહેવત છે, જો બધું સારી રીતે સમાપ્ત થાય તો તે સારું છે. મેં ગૃહ મંત્રાલય સહિત દરેક જવાબદારી નિભાવી છે. મને જે પણ જવાબદારી સોંપવામાં આવે તે યોગ્ય રહેશે. તે મુખ્યમંત્રીનો વિશેષાધિકાર છે.’

૭૭ વર્ષીય છગન ભુજબળની રાજકીય કારકિર્દી દાયકાઓ લાંબી છે, તેઓ ગયા વર્ષે ડિસેમ્બરમાં મહારાષ્ટ્રના મુખ્યમંત્રી દેવેન્દ્ર ફડણવીસના મંત્રીમંડળ વિસ્તરણ દરમિયાન ખાસ કરીને ગેરહાજર રહ્યા હતા. તે સમયે, રાજ્યના એક અગ્રણી OBC ચહેરા, અનુભવી નેતા, છગન ભુજબળે જાહેરમાં નિરાશા વ્યક્ત કરી હતી. માર્ચમાં ખાદ્ય, નાગરિક પુરવઠા અને ગ્રાહક સુરક્ષા મંત્રી પદેથી રાજીનામું આપનારા NCPના દિગ્ગજ નેતા ધનંજય મુંડેના રાજીનામા બાદ મંત્રીમંડળમાં તેમનો સમાવેશ થયો હતો. મુંડેએ સ્વાસ્થ્યના કારણોસર રાજીનામું આપ્યું હતું, પરંતુ સરપંચ સંતોષ દેશમુખ હત્યા કેસ (Santosh Deshmukh murder case)માં તેમના નજીકના સહાયક વાલ્મિક કરાડ (Walmik Karad)નું નામ મુખ્ય આરોપી તરીકે જાહેર થયા બાદ મંત્રીમંડળમાંથી તેમની વિદાય થઈ હતી.

ભૂતકાળમાં, નાસિક (Nashik) જિલ્લાના યેઓલા (Yeola)ના ધારાસભ્ય ભુજબળે વિવિધ સરકારોમાં કેબિનેટ મંત્રી તરીકે સેવા આપી છે, જેમાં ડેપ્યુટી સીએમનો પણ સમાવેશ થાય છે.

નોંધનીય છે કે, શાસક મહાયુતિ ગઠબંધનમાં ભારતીય જનતા પાર્ટી – ભાજપ (Bharatiya Janata Party - BJP), શિવસેના (Shiv Sena) અને નાયબ મુખ્યમંત્રી અજિત પવાર (Ajit Pawar)ના નેતૃત્વ હેઠળના NCPનો સમાવેશ થાય છે.