ન્યૂઝ શોર્ટમાં: ઍપ-બેઝ્ડ કૅબ્સની કંપનીઓની રજિસ્ટ્રેશન માટેની ડેડલાઇન નક્કી : પહેલી સપ્ટેમ્બર

બધા જ ઑપરેટરો નવી પૉલિસીનું પાલન કરે છે કે નહીં એની ખાતરી કરવામાં આવશે એમ તેમણે જણાવ્યું હતું. 

પ્રતીકાત્મક તસવીર

મહારાષ્ટ્ર સરકારે રાજ્યમાં બધી જ ઍપ-આધારિત પૅસેન્જર ટ્રાન્સપોર્ટ સર્વિસ આપતી કંપનીઓને પહેલી સપ્ટેમ્બર સુધીમાં ઍગ્રિગેટર પૉલિસી 2026 હેઠળ આ વર્ષે રજિસ્ટ્રેશન કરાવવાની સૂચના આપી છે. પહેલી સપ્ટેમ્બરની ડેડલાઇન બાદ રજિસ્ટ્રેશનની પ્રક્રિયા પૂરી ન કરનારી અથવા નિયમોનું ઉલ્લંઘન કરનારી કંપનીઓ વિરુદ્ધ કડક કાર્યવાહી કરવામાં આવશે એવી ચેતવણી સરકારે આપી છે. મહારાષ્ટ્રના ટ્રાન્સપોર્ટ મિનિસ્ટર પ્રતાપ સરનાઈકે જણાવ્યું હતું કે નવી પૉલિસીથી ઍપ-આધારિત પૅસેન્જર ટ્રાન્સપોર્ટ વધુ સુર‍િક્ષત અને પારદર્શક બનશે. બધા જ ઑપરેટરો નવી પૉલિસીનું પાલન કરે છે કે નહીં એની ખાતરી કરવામાં આવશે એમ તેમણે જણાવ્યું હતું. 

ખાડાને કારણે ખીણમાં ખાબકી રિક્ષા

ADVERTISEMENT

મીરા-ભાઈંદરમાં ઘોડબંદર રોડ પર ખાડાને કારણે રિક્ષા પરથી ડ્રાઇવરે કાબૂ ગુમાવતાં રિક્ષા ખીણમાં પડી ગઈ હતી. જોકે રિક્ષા-ડ્રાઇવર સમયસર રિક્ષામાંથી બહાર કૂદી જતાં તેનો જીવ બચી ગયો હતો. પછીથી ક્રેન વડે ખીણમાંથી રિક્ષા બહાર કાઢવામાં આવી ત્યારે એની દશા જોઈને જો ડ્રાઇવર એમાંથી કૂદ્યો ન હોત તો તેના કેવા હાલ થાત એનો અંદાજ લગાવી શકાય છે.

ગુજરાતમાં આજથી ત્રણ દિવસ ભારે, વહીવટી તંત્ર થયું સાબદું: અમદાવાદ, સુરત, તાપી, ડાંગ, વડોદરા, નર્મદા, આણંદ સહિતના જિલ્લાઓ હાઈ અલર્ટ : સ્કૂલોમાં આજે રજા

ગુજરાતમાં મેઘરાજાએ ફરી ભારે મેઘગર્જના કરવાની તૈયારી કરી લીધી છે જેના કારણે આજથી ૩ દિવસ ગુજરાત માટે ભારે છે. ગુજરાતમાં આજે તેમ જ ૧-૨ ઑગસ્ટ દરમ્યાન ભારેથી અતિભારે વરસાદની આગાહી હવામાન વિભાગે કરી છે જેના પગલે અમદાવાદ, સુરત, વડોદરા, ભાવનગર, ભરૂચ, આણંદ, નર્મદા, તાપી, ડાંગ, છોટાઉદેપુર, પંચમહાલ, દાહોદ અને મહીસાગર સહિતના વિસ્તારોમાં હાઈ અલર્ટ જાહેર કરવામાં આવ્યું છે.