CCTV કૅમેરાનાં ફુટેજ જોયા બાદ પશુ-ક્રૂરતાને લગતો ગુનો દાખલ
પ્રતીકાત્મક તસવીર
વસઈ ફોર્ટ બંદર જેટી વિસ્તારમાં એક કારડ્રાઇવર દ્વારા રસ્તા પર સૂતેલા ૭ મહિનાના માસૂમ ગલૂડિયા ઉપર નિર્દયતાથી ગાડી ચલાવી દેવાની ઘટના સામે આવતાં સ્થાનિકોમાં ભારે રોષ વ્યાપી ગયો છે. આ હૃદયદ્રાવક ઘટનાનાં CCTV કૅમેરાનાં ફુટેજ સોશ્યલ મીડિયા પર વાઇરલ થયા છે, જેમાં ડ્રાઇવરની ઘોર બેદરકારી અને ક્રૂરતા સ્પષ્ટપણે દેખાઈ રહી છે. આ મામલે વસઈ પોલીસે અજાણ્યા ડ્રાઇવર વિરુદ્ધ ગુનો નોંધીને તપાસ હાથ ધરી છે.
ઘટનાની વિગતો મુજબ વસઈ અને ભાઈંદર વચ્ચે ચાલતી રો-રો ફેરી સેવાને કારણે વસઈ ફોર્ટ બંદર જેટી પર મુસાફરોની ભારે અવરજવર રહે છે. શનિવારે સવારે ૯:૦૦ વાગ્યાના સુમારે એક કારડ્રાઇવર જેટી પાસે પહોંચ્યો હતો અને ટિકિટ ખરીદવા માટે ગાડીમાંથી નીચે ઊતર્યો હતો.
ADVERTISEMENT
આ સમયે કારની બરાબર સામે થોડા અંતરે એક ૭ મહિનાનું ગલૂડિયું નિરાંતે સૂતું હતું. ટિકિટ લઈને પરત ફરેલા ડ્રાઇવરે ગલૂડિયાને હટાવવાનો કે હૉર્ન વગાડવાનો કોઈ પણ પ્રયાસ કર્યા વિના સીધી જ કાર એના ઉપર ચડાવી દીધી હતી. આ અમાનવીય કૃત્યને કારણે ગંભીર રીતે ઘવાયેલા ગલૂડિયાનું ઘટનાસ્થળે જ લોહીલુહાણ હાલતમાં મોત થયું હતું.
આ ઘટનાની જાણ થતાં જ રો-રો સેવાના મૅનેજરે ઘટનાસ્થળે પહોંચી CCTV કૅમેરાનાં ફુટેજની તપાસ કરી હતી. ફુટેજમાં ડ્રાઇવરની બેદરકારી સ્પષ્ટ થતાં તેમણે વસઈ પોલીસ-સ્ટેશનમાં ફરિયાદ નોંધાવી હતી. હાલમાં વસઈ પોલીસે વાહનના રજિસ્ટ્રેશન નંબરના આધારે ડ્રાઇવરની ઓળખ કરીને તેની શોધખોળ હાથ ધરી છે.
