‘ઇન્ડિયાઝ ગૉટ લેટેન્ટ’ વિવાદ મામલે સુપ્રીમ કોર્ટે કૉમેડિયન સમય રૈનાને 3 લાખ રૂપિયાનો દંડ ફટકાર્યો છે. કોર્ટે કહ્યું કે તેણે કોર્ટને ગેરમાર્ગે દોર્યા અને અગાઉના આદેશોનું યોગ્ય પાલન કર્યું નથી. જાણો સમગ્ર મામલો.
સમય રૈના
સુપ્રીમ કોર્ટે કૉમેડિયન સમય રૈના પર 3 લાખ રૂપિયાનો દંડ લગાવ્યો છે. મંગળવારે થયેલી સુનાવણી દરમિયાન કોર્ટે કહ્યું કે સમય રૈનાએ કોર્ટ સામે ખોટી માહિતી આપી હતી અને અગાઉ આપવામાં આવેલા આદેશોનું યોગ્ય રીતે પાલન પણ કર્યું ન હતું. આ મામલો લોકપ્રિય શો ‘ઇન્ડિયાઝ ગૉટ લેટેન્ટ’ સાથે જોડાયેલા વિવાદને લઈને છે. ભારતના મુખ્ય ન્યાયાધીશ સૂર્યકાંત, જસ્ટિસ જયમાલ્યા બાગચી અને જસ્ટિસ જે.વી. મોહનાની બૅન્ચે આ નિર્ણય આપ્યો હતો. કોર્ટે સમય રૈનાને બે અઠવાડિયાની અંદર દંડની રકમ જમા કરવાનો આદેશ આપ્યો છે. સુપ્રીમ કોર્ટે સ્પષ્ટ કહ્યું છે કે જો નક્કી કરેલા સમયગાળામાં દંડની રકમ જમા નહીં કરાવવામાં આવે તો તેની વિરુદ્ધ વધુ કડક કાર્યવાહી કરવામાં આવી શકે છે.
રિપોર્ટ મુજબ, સુપ્રીમ કોર્ટની (Supreme Court) સુનાવણી દરમિયાન કોર્ટે સમય રૈનાને (Samay Raina) કહ્યું કે, “તમે કોર્ટને ગેરમાર્ગે દોર્યા છે.” આ મામલો રણવીર અલાહાબાદિયા, આશિષ ચંચલાની અને ક્યોર એસએમએ ફાઉન્ડેશન દ્વારા દાખલ કરવામાં આવેલી અરજીઓની સુનાવણી દરમિયાન સામે આવ્યો હતો. આ અરજીઓ ‘ઇન્ડિયાઝ ગૉટ લેટેન્ટ’ની પહેલી સિઝનમાં કરવામાં આવેલી કેટલીક ટિપ્પણીઓ બાદ ઉભા થયેલા વિવાદ સાથે સંબંધિત છે. શોમાં કરવામાં આવેલી કેટલીક ટિપ્પણીઓને લઈને ભારે વિવાદ થયો હતો અને ત્યારબાદ આ મામલો કોર્ટ સુધી પહોંચ્યો હતો.
ADVERTISEMENT
સમય રૈનાએ પ્રોમિસ પૂરું ન કરવાનો આક્ષેપ
સુનાવણી દરમિયાન સિનિયર વકીલ અપારજિતા સિંહે કોર્ટને જણાવ્યું કે સમય રૈનાએ અગાઉ કોર્ટમાં ખાતરી આપી હતી. તેણે કહ્યું હતું કે સમય રૈના ક્યોર એસએમએ ફાઉન્ડેશન અને સ્પાઇનલ મસ્ક્યુલર એટ્રોફી (SMA)થી પીડિત લોકોનો સંપર્ક કરશે. પરંતુ અત્યાર સુધી તેણે આ વચન પૂરું કર્યું નથી. આ બાબતને લઈને કોર્ટે સમય રૈનાના વલણ પર નારાજગી વ્યક્ત કરી હતી.
સિનિયર વકીલ અપારજિતા સિંહે સુનાવણી દરમિયાન સમય રૈનાના વલણ પર સવાલ ઉઠાવ્યા હતા. તેમણે કહ્યું કે સમય રૈના સતત શો કરી રહ્યો છે, પરંતુ કોર્ટના આદેશ છતાં તેણે હજી સુધી એસએમએ ફાઉન્ડેશન અથવા દર્દીઓ સાથે સંપર્ક કર્યો નથી. વકીલે વધુમાં કહ્યું કે, “સમજાતું નથી કે આવા લોકો યુવાનો માટે કેવી રીતે રોલ મૉડલ બની શકે છે.”
કોર્ટના નિર્ણય બાદ આગળની કાર્યવાહી પર સૌનું ધ્યાન
સુપ્રીમ કોર્ટે સમય રૈનાને દંડની રકમ બે અઠવાડિયામાં જમા કરવાનો આદેશ આપ્યો છે. હવે આ મામલે આગળની કાર્યવાહી અને કોર્ટના નિર્દેશોનું પાલન કેવી રીતે થાય છે તેના પર સૌની નજર રહેશે. ‘ઇન્ડિયાઝ ગૉટ લેટેન્ટ’ વિવાદે એકવાર ફરી જાહેર મંચ પર જવાબદારીપૂર્વક કન્ટેન્ટ રજૂ કરવાની ચર્ચાને આગળ ધપાવી છે.
