પહેલી લૉટરીના ૨૦,૦૦૦ રૂપિયાના ઇનામમાંથી ૧૦૦૦ રૂપિયાવાળી ટિકિટ ખરીદી અને એમાં ૫૦ લાખ રૂપિયાનો જૅકપૉટ લાગ્યો
ચરણજિત સિંહ
પંજાબના મોગા જિલ્લાના ૬૬ વર્ષના ખેડૂત ચરણજિત સિંહ પર એક જ દિવસમાં લક્ષ્મીજી ઓળઘોળ થઈ ગયાં હતાં. છેલ્લાં ૧૫ વર્ષથી માત્ર શોખ ખાતર લૉટરીની ટિકિટ ખરીદતા આ ખેડૂતની કિસ્મત એક જ દિવસમાં બે-બે વાર ચમકી હતી, જેમાં તેમણે પહેલાં ૨૦,૦૦૦ રૂપિયાનું ઇનામ જીત્યું અને ત્યાર બાદ એ જ ઇનામી રકમમાંથી ખરીદેલી લૉટરી ટિકિટે તેમને ૫૦ લાખ રૂપિયાના બમ્પર જૅકપૉટના માલિક બનાવી દીધા છે.
ઘટનાના દિવસે ચરણજિત સિંહે ખરીદેલી એક ટિકિટ પર ૨૦,૦૦૦નું ઇનામ લાગ્યું હતું. તેઓ આ ઇનામની રકમ લેવા માટે લૉટરી-સ્ટૉલ પર પહોંચ્યા હતા. એ સમયે સ્ટૉલ પર ૧,૦૦૦ રૂપિયાની કિંમતવાળી એક લૉટરીની માત્ર છેલ્લી ટિકિટ બચી હતી. લૉટરી-વિક્રેતાની સલાહ પર ચરણજિત સિંહે જીતેલી રકમમાંથી ૧૦૦૦ રૂપિયા ખર્ચીને એ છેલ્લી ટિકિટ ખરીદી લીધી હતી.
ADVERTISEMENT
થોડા સમય પછી જ્યારે આ બીજી લૉટરીનું પરિણામ જાહેર થયું ત્યારે ચરણજિત સિંહની ખુશીનો પાર ન રહ્યો, કારણ કે તેમણે ખરીદેલી ટિકિટ પર જ ૫૦ લાખ રૂપિયાનો પ્રથમ પુરસ્કાર નીકળ્યો હતો.
