દિલ્હીની એક ફૂડ-બ્લૉગરે મુંબઈનો અસ્સલ વડાપાંઉ ખાવા માટે ₹5,000ની ફ્લાઇટ લીધી અને હોટેલમાં રોકાઈ કુલ ₹15,000 ખર્ચ્યા. આખરે ₹20નું રોડસાઇડ વડાપાંઉ ખાઈને તેણે આ સફરને પૈસાની વસૂલ ગણાવી.
દિલ્હી ફૂડ બ્લૉગર
શું તમે ક્યારેય માત્ર ૨૦ રૂપિયાની વાનગી ખાવા માટે અન્ય શહેરમાં વિમાન પકડીને ગયા છો? દિલ્હીની એક કન્ટેન્ટ-ક્રીએટરનો દાવો છે કે તેણે અસ્સલ મુંબઈયા વડાપાંઉ ખાવાની ઘેલછામાં કંઈક એવું જ કરી બતાવ્યું છે. સોશ્યલ મીડિયા પર વાઇરલ થવા લોકો જાતજાતના પ્રૅન્ક કરતા હોય છે એ જ રીતે આ છોકરી ગપગોળા હાંકતી હોઈ શકે છે, પણ જો તે સાચી હોય તો તેણે મુંબઈના વડાપાંઉ ખાવા શું કર્યું એ જાણી લઈએ.
WittySpace નામથી ઇન્સ્ટાગ્રામ અકાઉન્ટ ચલાવતી આ ફૂડ-બ્લૉગરે જણાવ્યું કે તે દિલ્હીમાં વડાપાંઉ ખાઈ રહી હતી ત્યારે તેને મનમાં વિચાર આવ્યો કે ‘આ પણ કોઈ વડાપાંઉ છે? અસલી વડાપાંઉ તો સપનોં કી નગરી મુંબઈમાં જ મળે.’ બસ, પછી શું? તેણે તરત બૅગ પૅક કરી અને મુંબઈની પ્લેનની ટિકિટ બુક કરી લીધી. દિલ્હીથી મુંબઈ માટે ૫૦૦૦ રૂપિયાની ફ્લાઇટ બુક કરી. ઍરપોર્ટ પર ૧૬૫ રૂપિયાની ચા પીધી અને ૫૦ રૂપિયાવાળાં નૂડલ્સ ૩૦૦ રૂપિયામાં આરોગ્યાં. મુંબઈ પહોંચીને ૪૦૦૦ રૂપિયાના ભાડાની હોટેલમાં રાત રોકાઈ. બીજા દિવસે ઑનલાઇન મગાવવાને બદલે તે પોતે મુંબઈની ગલીઓમાં ઘૂમી અને આખરે ૨૦ રૂપિયામાં મળતું અસલી રોડસાઇડ વડાપાંઉ ખોળી કાઢ્યું. ફ્લાઇટ, હોટેલ અને ખાવા-પીવાનો ખર્ચ ગણીને ફૂડ-બ્લૉગરને આ ખાણી-પીણીની યાત્રા પૂરા ૧૫,૦૦૦ રૂપિયામાં પડી. પોતાના વિડિયોમાં તેણે કહ્યું કે પહેલી બાઇટ લેતાં જ મને લાગ્યું કે આટલા પૈસા ખર્ચીને મુંબઈ આવવાનો નિર્ણય બિલકુલ સાચો હતો, આ જ અસલી મુંબઈની શાન છે.
