વર્લ્ડ રેકૉર્ડ માટે સબ-ઇન્સ્પેક્ટરે ૬ વર્ષની પૌત્રીને કાર ચલાવવા આપી

વિડિયો વાઇરલ થતાં મોટર વ્હીકલ ઍક્ટ અંતર્ગત તેમના પર કેસ દાખલ થયો

સબ-ઇન્સ્પેક્ટર તિરુપતિ પુજારી

તેલંગણના હૈદરાબાદમાં વર્લ્ડ રેકૉર્ડ બનાવવા માટે પૌત્રીને કાર ચલાવવા આપવાનું ઝનૂન સબ-ઇન્સ્પેક્ટર તિરુપતિ પુજારીને ભારે પડ્યું હતું. તિરુપતિની ઇચ્છા હતી કે તેની પૌત્રી સૌથી નાની વયની કારચાલક બને. એ માટે તેણે ૬ વર્ષની પૌત્રીને કાર ચલાવતાં શીખવવાનું શરૂ કર્યું હતું. પોતે પોલીસ સબ-ઇન્સ્પેક્ટર હોવાથી આ વાતનો કોઈ વિરોધ નહીં કરે એવું તેને લાગતું હતું. જોકે વ્યસ્ત રોડ પર પૌત્રીના હાથમાં સ્ટીઅરિંગ થમાવી દેવાનું તિરુપતિને ભારે પડ્યું હતું. કોઈકે આ ઘટનાનો વિડિયો બનાવ્યો હતો. એ વખતે ટ્રાફિક જૅમ થઈ ગયો હોવાથી અનેક લોકોએ બાળકીને કાર ચલાવવા આપવા બદલ વિરોધ કર્યો હતો. એ છતાં પોલીસ-અધિકારીએ પોતાની ભૂલ સ્વીકારવાને બદલે આ તો વર્લ્ડ રેકૉર્ડ માટેની ટ્રેઇનિંગ છે એમ કહીને બચાવ કર્યો હતો. જોકે વિડિયો વાઇરલ થતાં મોટર વ્હીકલ ઍક્ટ અંતર્ગત તેમના પર કેસ દાખલ થયો અને જવાબદાર પદ પર હોવા છતાં આવા બેજવાબદારીભર્યા કામને સપોર્ટ કરવા બદલ તેને સસ્પેન્ડ કરવામાં આવ્યો.