આજે WPL 2026ની એલિમિનેટર મૅચમાં દિલ્હી કૅપિટલ્સ-ગુજરાત જાયન્ટ્સની ટક્કર

૩ વખતની ફાઇનલિસ્ટ દિલ્હી સામે ગુજરાત પહેલી વખત ફાઇનલમાં પહોંચવાનો ટાર્ગેટ રાખશે

વિમેન્સ પ્રીમિયર લીગના ઇતિહાસમાં બન્ને ટીમ ૮ વખત સામસામે રમી છે

બરોડાના કોટંબી સ્ટેડિયમમાં આજે વિમેન્સ પ્રીમિયર લીગ (WPL) 2026ની એલિમિનેટર મૅચ રમાશે. મેગ લૅનિંગની કૅપ્ટન્સીમાં પહેલી૩ સીઝનમાં ડાયરેક્ટ ફાઇનલમાં એન્ટ્રી કરનાર દિલ્હી કૅપિટલ્સ પહેલી વખત પ્લેઑફ મૅચ રમશે. ગુજરાત જાયન્ટ્સ સતત બીજી વખત એલિમિનેટર મૅચ રમશે. છેલ્લી સીઝનમાં ગુજરાતને પ્લેઑફ મૅચમાં ડિફેન્ડિંગ ચૅમ્પિયન મુંબઈ ઇન્ડિયન્સ સામે હારનો સામનો કરવો પડ્યો હતો.

વિમેન્સ પ્રીમિયર લીગના ઇતિહાસમાં બન્ને ટીમ ૮ વખત સામસામે રમી છે. બન્ને ટીમે એકબીજા સામે ૪-૪ મૅચ જીતી છે. વર્તમાન સીઝનની બન્ને લીગ મૅચમાં ઍશ્લી ગાર્ડનરની ગુજરાતે જેમિમા રૉડ્રિગ્સની દિલ્હીને ૪ રન અને ૩ રનના નાના અંતરથી માત આપી છે. દિલ્હી સામે સતત ચોથી વખત ફાઇનલમાં એન્ટ્રી મારવાનું પ્રેશર રહેશે, જ્યારે સતત ૩ મૅચથી અજેય રહેલી ગુજરાતની ટીમ પહેલી વખત ફાઇનલમાં પહોંચવાના ટાર્ગેટ સાથે મેદાન પર ઊતરશે.