નામિબિયા અને ઝિમ્બાબ્વેમાં જાન્યુઆરીમાં રમાનારા અન્ડર 19 વર્લ્ડ કપનું શેડ્યુલ જાહેર

ભારતનો પ્રથમ મુકાબલો USA સામે, લીગમાં પાકિસ્તાન સાથે ટક્કર નહીં : ૧૫ જાન્યુઆરીથી ૬ ફેબ્રુઆરી દરમ્યાન ૨૧ દિવસમાં ૪૧ મૅચ રમાશે

ફાઇલ તસવીર

અન્ડર 19 વર્લ્ડ કપ 2026નું શેડ્યુલ ગઈ કાલે જાહેર કરવામાં આવ્યું હતું. નામિબિયા અને ઝિમ્બાબ્વેની સયુંક્ત યજમાનીમાં રમાનારી આ ટુર્નામેન્ટ આવતા વર્ષે ૧૫ જાન્યુઆરીએ શરૂ થશે અને ફાઇનલ ૬ ફેબ્રુઆરીએ રમાશે. ૨૧ દિવસ ચાલનારી આ મેગા ઇવેન્ટમાં કુલ ૪૧ મૅચ રમાશે.

કુલ ૧૬ ટીમને ૪-૪ ટીમ પ્રમાણે ૪ ગ્રુપમાં વહેંચી દેવામાં આવી છે. ભારત ગ્રુપ Aમાં USA, ન્યુ ઝીલૅન્ડ અને બંગલાદેશ સાથે છે. પ્રથમ દિવસે ભારતની ટક્કર USA સામે થશે. કટ્ટર હરીફ ભારત અને પાકિસ્તાન એક જ ગ્રુપમાં ન હોવાથી લીગ રાઉન્ડમાં તેમની વચ્ચે કોઈ ટક્કર નહીં જોવા મળે, પણ જો બન્ને ટીમ સુપર સિક્સ રાઉન્ડમાં પ્રવેશ કરવામાં સફળ થશે તો જંગ જોવા મળશે. 

ADVERTISEMENT

આ રીતે વહેંચાઈ છે ૪ ગ્રુપમાં ૧૬ ટીમ

ગ્રુપ A : બંગલાદેશ, ભારત, ન્યુ ઝીલૅન્ડ, USA
ગ્રુપ B : ઇંગ્લૅન્ડ, પાકિસ્તાન, સ્કૉટલૅન્ડ, ઝિમ્બાબ્વે
ગ્રુપ C : ઑસ્ટ્રેલિયા, આયરલૅન્ડ, જપાન, શ્રીલંકા
ગ્રુપ D : અફઘાનિસ્તાન, સાઉથ આફ્રિકા, તંજાનિયા, વેસ્ટ ઇન્ડીઝ

સૌથી વધુ પાંચ વાર ચૅમ્પિયન બન્યું છે ભારત

અન્ડર 19 વર્લ્ડ કપની આ સોળમી એડિશન છે. અત્યાર સુધી સૌથી વધુ પાંચ વાર; ૨૦૦૦, ૨૦૦૮, ૨૦૧૨, ૨૦૧૮ અને ૨૦૨૨માં ચૅમ્પિયન બની છે ભારતીય ટીમ. ઑસ્ટ્રેલિયા ૪ વાર, પાકિસ્તાન બે વાર તથા બંગલાદેશ, વેસ્ટ ઇન્ડીઝ, ઇંગ્લ‍ૅન્ડ અને સાઉથ આફ્રિકા એક-એક વાર ચૅમ્પિયન રહી ચૂક્યા છે. ભારતીય ટીમ ૪-૪ વાર; ૨૦૦૬, ૨૦૧૬, ૨૦૨૦ અને ૨૦૨૪માં રનર-અપ રહી હતી. છેલ્લે ૨૦૨૪માં સાઉથ આફ્રિકામાં રમાયેલા અન્ડર 19 વર્લ્ડ કપમાં ફાઇનલમાં ભારત ઑસ્ટ્રેલિયા સામે ૭૯ રનથી હારી ગયું હતું.