ફાઇનલમાં ૩૪૯ રનના ટાર્ગેટ સામે વિદર્ભની ટીમ ૩૧૨ રનમાં સમેટાઈ જતાં કર્ણાટકની ૩૬ રને જીત થઈ
પાંચમી વાર વિજય હઝારે ટ્રોફીમાં ચૅમ્પિયન બની કર્ણાટકની ટીમ.
વડોદરામાં આયોજિત વિજય હઝારે ટ્રોફી 2024-25ની ફાઇનલમાં વિદર્ભ સામે કર્ણાટકની ૩૬ રને જીત થઈ છે. કર્ણાટકની ટીમે ૬ વિકેટ ગુમાવીને ૩૪૮ રન ખડકી દીધા હતા, જવાબમાં પહેલી વાર આ ટુર્નામેન્ટની ફાઇનલ રમી રહેલી વિદર્ભની ટીમ ૪૮.૨ ઓવરમાં ૩૧૨ રન બનાવીને ઑલઆઉટ થઈ ગઈ હતી. તામિલનાડુની જેમ હવે કર્ણાટક પણ સૌથી વધુ પાંચ વાર આ ટુર્નામેન્ટની ચૅમ્પિયન બનનારી ટીમ બની છે.
ADVERTISEMENT
કરુણ નાયર બન્યો પ્લેયર ઑફ ધ સિરીઝ.
એક સમયે કર્ણાટકની ટીમ માટે રમનાર વિદર્ભ ટીમના કૅપ્ટન કરુણ નાયર સૌથી વધારે રન ફટકારી પ્લેયર ઑફ ધ ટુર્નામેન્ટ બન્યો હતો. તેણે ૯ મૅચની ૮ ઇનિંગ્સમાં ૩૮૯.૫૦ની ઍવરેજ અને ૧૨૪.૦૪ના સ્ટ્રાઇક-રેટથી ૭૭૯ રન ફટકાર્યા છે જે એક વિજય હઝારે ટ્રોફીની સીઝનનો ત્રીજો સૌથી વધુ રનનો રેકૉર્ડ છે. તેણે આ દરમ્યાન એક ફિફ્ટી અને પાંચ સેન્ચુરી પણ ફટકારી છે. કર્ણાટકનો કૅપ્ટન મયંક અગ્રવાલ ૧૦ મૅચમાં ૬૫૧ રન સાથે બીજો હાઇએસ્ટ રન-સ્કોરર રહ્યો છે.
