વિમેન્સ વર્લ્ડ કપની પ્લેયર ઑફ ધ ટુર્નામેન્ટ દીપ્તિ શર્માને યુપીએ જવા ન જ દીધી, ૩.૨ કરોડ રૂપિયા વાપર્યા : વિદેશી પ્લેયર્સનાં તમામ ૨૩ ખાલી સ્પૉટ ભરાયાં અને ૬ ભારતીય પ્લેયર્સનાં સ્પૉટ ખાલી રહ્યાં
યુપી વૉરિયર્સે દીપ્તિ શર્માને પ્રથમ સીઝનમાં ૨.૬૦ કરોડ રૂપિયામાં ખરીદી હતી અને એ પછીની બે સીઝનમાં પણ તેની સૅલેરી એટલી જ હતી. હવે ચોથી સીઝનમાં તેની કિંમત વધી ગઈ ( 3.2cr) છે.
દિલ્હીમાં ગઈ કાલે આયોજિત વિમેન્સ પ્રીમિયર લીગ (WPL)ની ચોથી સીઝન માટે યોજાયેલા મેગા ઑક્શનમાં પાંચ ટીમનાં ૭૩માંથી ૬૭ ખાલી સ્પૉટ માટે પ્લેયર્સની ખરીદી થઈ હતી. વિદેશી પ્લેયર્સ માટે પાંચ ટીમમાં ખાલી રહેલાં તમામ ૨૩ ખાલી સ્પૉટ માટે પ્લેયર્સ ખરીદવામાં આવ્યા, જ્યારે ભારતીય પ્લેયર્સનાં ૬ સ્પૉટ ખાલી રહ્યાં છે.
પાંચ ટીમમાંથી ગુજરાત જાયન્ટ્સ અને યુપી વૉરિયર્સે ૧૮-૧૮ સભ્યોની સંપૂર્ણ સ્ક્વૉડ બનાવી હોવા છતાં બન્ને પાસે ૧૫-૧૫ લાખ રૂપિયા બચ્યા હતા; જ્યારે દિલ્હી કૅપિટલ્સ, મુંબઈ ઇન્ડિયન્સ અને રૉયલ ચૅલેન્જર્સ બેન્ગલુરુ સંપૂર્ણ પર્સ ખાલી કરીને પણ ૧૬-૧૬ સભ્યોની જ સ્ક્વૉડ બનાવી શકી હતી. રાઇટ ટુ મૅચ (RTM) કાર્ડથી ટીમે પોતાના જૂના પ્લેયર્સને હરીફ ટીમની બોલીની કિંમતે પણ ખરીદી લીધી હતી. યુપીએ પોતાનાં ૪ અને બૅન્ગલોરે પોતાના બચેલા એક RTM કાર્ડનો ઉપયોગ કર્યો હતો. ગુજરાતે ત્રણમાંથી બે કાર્ડનો ઉપયોગ કર્યો હતો.
ADVERTISEMENT
વિમેન્સ વન-ડે વર્લ્ડ કપ 2025ની પ્લેયર ઑફ ધ ટુર્નામેન્ટ ઑલરાઉન્ડર દીપ્તિ શર્માને વર્તમાન ઑક્શનમાં સૌથી વધુ ૩.૨ કરોડ રૂપિયામાં તેની જૂની ટીમ યુપી વૉરિયર્સે ખરીદી હતી. સૌથી પહેલાં માત્ર દિલ્હીએ ૫૦ લાખની બેઝ-પ્રાઇસમાં દીપ્તિ માટે બોલી લગાવી હતી. RTM કાર્ડથી યુપીએ એ જ કિંમતે તેને ખરીદવાની તૈયારી બતાવતાં દિલ્હીએ ૩.૨ કરોડ રૂપિયાની ફાઇનલ બોલી લગાવી હતી જેને મૅચ કરીને યુપીએ દીપ્તિને ટીમમાં જાળવી રાખી હતી.
સ્મૃતિ માન્ધનાને ૨૦૨૩ના ઑક્શનમાં સૌથી વધુ ૩.૪ કરોડ રૂપિયામાં બૅન્ગલોર માટે ખરીદવામાં આવી હતી. દીપ્તિ શર્મા હાઇએસ્ટ બોલીના ઓવરઑલ લિસ્ટમાં સંયુક્ત રીતે બીજા ક્રમે છે. ૨૦૨૩માં ગુજરાતે ઍશ્લી ગાર્ડનર અને મુંબઈએ નૅટ સિવર-બ્રન્ટને ૩.૨ કરોડ રૂપિયામાં ખરીદી હતી.
WPL ઑક્શનમાં આ પ્લેયર્સ પર જ કરોડ રૂપિયાની બોલી લાગી
દીપ્તિ શર્મા (યુપી) : ૩.૨ કરોડ
મેલી કેર (મુંબઈ) : ૩ કરોડ
શિખા પાંડે (યુપી) : ૨.૪ કરોડ
સોફી ડિવાઇન (ગુજરાત) : ૨ કરોડ
મેગ લૅનિંગ (યુપી) : ૧.૯ કરોડ
ચિનેલ હેન્રી (દિલ્હી) : ૧.૩ કરોડ
શ્રી ચારણી (દિલ્હી) : ૧.૩ કરોડ
ફીબ લિચફીલ્ડ (યુપી) : ૧.૨ કરોડ
લૉરા વૉલ્વાર્ટ (દિલ્હી) : ૧.૧ કરોડ
આશા સોભના (યુપી) : ૧.૧ કરોડ
જ્યૉર્જિયા વેરહામ (ગુજરાત) : ૧ કરોડ
WPLની ચોથી સીઝનની યજમાની નવી મુંબઈ અને બરોડાને મળી
WPLના ઑક્શન દરમ્યાન લીગના અધ્યક્ષ જયેશ જ્યૉર્જે ચોથી સીઝનના વેન્યુ અને તારીખની ઑફિશ્યલ જાહેરાત કરી હતી. ચોથી સીઝન પાંચ ટીમો વચ્ચે ૯ જાન્યુઆરીથી ૫ ફેબ્રુઆરી વચ્ચે રમાશે. સામાન્ય રીતે ફેબ્રુઆરી-માર્ચ દરમ્યાન યોજાતી આ લીગને આ વર્ષે ૭ ફેબ્રુઆરીથી શરૂ થતા મેન્સ T20 વર્લ્ડ કપને ધ્યાનમાં રાખીને થોડી વહેલી શરૂ કરવામાં આવશે.
વિમેન્સ વન-ડે વર્લ્ડ કપ 2025ની ફાઇનલ મૅચના વેન્યુ એવા નવી મુંબઈના ડી. વાય. પાટીલ સ્ટેડિયમમાં ઓપનિંગ મૅચ રમાશે અને ફાઇનલ મૅચ બરોડાના કોટમ્બી સ્ટેડિયમમાં રમાશે. આ બન્ને વેન્યુ પર જ આખી ટુર્નામેન્ટ રમાશે. પહેલી સીઝન મુંબઈ અને નવી મુંબઈમાં, બીજી સીઝન બૅન્ગલોર અને દિલ્હીમાં જ્યારે ત્રીજી સીઝન બૅન્ગલોર, લખનઉ, મુંબઈ અને બરોડામાં રમાઈ હતી.
વિમેન્સ પ્રીમિયર લીગને બે સીઝન માટે ત્રણ નવા સ્પૉન્સર મળ્યા
ભારતીય ક્રિકેટ બોર્ડે વિમેન્સ પ્રીમિયર લીગ (WPL) ૨૦૨૬ અને ૨૦૨૭ સીઝન માટે ૪૮ કરોડ રૂપિયાના નવા ભાગીદાર કરારને અંતિમ સ્વરૂપ આપ્યું છે. ChatGPT અને કિંગફિશર પૅકેજ્ડ ડ્રિન્કિંગ વૉટરને પ્રીમિયર પાર્ટનર્સ તરીકે પસંદ કરવામાં આવ્યાં છે. બિસલેરીને લીગ માટે બેવરેજ પાર્ટનર તરીકે ઉમેરવામાં આવી છે. છેલ્લી ૩ સીઝનથી ટાઇટલ પાર્ટનર તાતા ગ્રુપ, પ્રીમિયર પાર્ટનર્સ સિન્ટેક્સ, હર્બલાઇફ અને સ્ટ્રૅટેજિક ટાઇમ-આઉટ પાર્ટનર CEAT આ ટુર્નામેન્ટના સ્પૉન્સર રહ્યાં છે.
ઍલિસા હીલી સહિત આ મોટી પ્લેયર્સ અનસોલ્ડ રહી
મેગા ઑક્શનમાં ઑસ્ટ્રેલિયન કૅપ્ટન ઍલિસા હીલી, ઑસ્ટ્રેલિયન સ્પિનર અલાના કિંગ, ભારતીય વિકેટકીપર-બૅટર ઉમા છેત્રી, શ્રીલંકન કૅપ્ટન ચામરી અટાપટુ, ઇંગ્લૅન્ડની ઑલરાઉન્ડર હીધર નાઇટ, ઇંગ્લૅન્ડની વિકેટકીપર-બૅટર ઍમી જોન્સ સહિતની મોટી પ્લેયર્સ અનસોલ્ડ રહી હતી.
આ રહ્યા ચમકારા
યુપી વૉરિયર્સ ટીમે RTM કાર્ડથી સોફી એક્લસ્ટનને ૮૫ લાખ, કિરણ નવગિરેને ૬૦ લાખ અને ક્રાન્તિ ગૌડને ૫૦ લાખ રૂપિયામાં ખરીદી હતી. મેન્ટર અને કોચ અભિષેક નાયરે દિલ્હીની ભૂતપૂર્વ કૅપ્ટન મેગ લૅનિંગ (૧.૯ કરોડ), પહેલી વખત ઑક્શનમાં ઊતરેલી પ્રતીકા રાવલ (૫૦ લાખ), શિખા પાંડે (૨.૪ કરોડ) અને ફીબ લિચફીલ્ડ (૧.૨ કરોડ) જેવી સ્ટાર પ્લેયર્સને પોતાની ટીમમાં સામેલ કરી છે.
મુંબઈ ઇન્ડિયન્સે ન્યુ ઝીલૅન્ડની ઑલરાઉન્ડર મેલી કેરને ૩ કરોડ રૂપિયામાં ખરીદીને એણે ટુર્નામેન્ટના ઑક્શનના ઇતિહાસની ત્રીજી સૌથી મોંઘી પ્લેયર બનાવી હતી. મુંબઈએ શબનીમ ઇસ્માઇલ (૬૦ લાખ) અને સજના સજીવન (૭૫ લાખ રૂપિયા)ને પોતાની ટીમમાં ફરી સામેલ કરી છે.
ગુજરાત જાયન્ટ્સે સોફી ડિવાઇન (બે કરોડ), જ્યૉર્જિયા વેરહામ (એક કરોડ), રેણુકા સિંહ ઠાકુર (૬૦ લાખ), યાસ્તિકા ભાટિયા (૫૦ લાખ)ને ખરીદીને સૌનું ધ્યાન ખેંચ્યું હતું. RTM કાર્ડથી કાશ્વી ગૌતમ (૬૫ લાખ) અને ભારતી ફૂલમાલી (૭૦ લાખ)ને ફરી ટીમમાં સામેલ કરી છે.
દિલ્હી કૅપિટલ્સે વન-ડે વર્લ્ડ કપની હાઇએસ્ટ રન-સ્કોરર સાઉથ આફ્રિકાની લૉરા વૉલ્વાર્ટને ૧.૧ કરોડ રૂપિયામાં ખરીદી હતી. સ્ટાર સ્પિનર શ્રી ચારણી અને વેસ્ટ ઇન્ડીઝની મિડલ ઑર્ડર બૅટર ચિનેલ હેન્રી બન્નેને ૧.૩ કરોડ રૂપિયામાં ટીમમાં સામેલ કરવામાં આવી હતી. ભારતની અનુભવી બોલર સ્નેહ રાણા ૫૦ લાખ રૂપિયામાં દિલ્હીમાં સામેલ થઈ છે.
રૉયલ ચૅલેન્જર્સ બેન્ગલુરુએ એકમાત્ર RTM કાર્ડથી સ્પિનર પ્રેમા રાવતને ૨૦ લાખ રૂપિયામાં ખરીદી હતી. સ્ટાર બોલર રાધા યાદવ (૬૫ લાખ), અરુંધતી રેડ્ડી (૭૫ લાખ), પૂજા વસ્ત્રાકર (૮૫ લાખ) અને ગ્રેસ હૅરિસ (૭૫ લાખ)ને પણ બૅન્ગલોરે પોતાની ટીમમાં સામેલ કરી છે.
