ભારતે કૅનેડા સામે ૧૪-૩ની ધમાકેદાર જીત સાથે ટૉપ-ટૂમાં જગ્યા પાક્કી કરી હતી
કૅનેડા સામે ૧૪-૩થી ધમાકેદાર જીત મેળવી ભારતીય હૉકી પ્લેયર્સે
મલેશિયામાં આયોજિત ૩૧મી સુલતાન અઝલાન શાહ કપ હૉકી ટુર્નામેન્ટની આજે ફાઇનલ મૅચ રમાશે. ગઈ કાલે કૅનેડાને ૧૪-૩ની સ્કોરલાઇનથી કચડીને ભારતીય સિનિયર મેન્સ ટીમે ૬ ટીમ વચ્ચે ટૉપ-ટૂમાં પોતાનું સ્થાન પાક્કું કર્યું હતું. આખી ટુર્નામેન્ટમાં ભારત માત્ર બેલ્જિયમ સામે ૩-૨થી હાર્યું છે. આજે ફાઇનલમાં ભારતની ટક્કર એ જ અજેય ટીમ બેલ્જિયમ સામે છે. ભારતીય સમય અનુસાર સાંજે ૮.૩૦ વાગ્યે આ ફાઇનલ જંગ શરૂ થશે.
૧૯૮૩થી રમાતી આ વાર્ષિક ટુર્નામેન્ટમાં મલેશિયા ૬ ટીમને ટ્રોફી જીતવાના આ જંગમાં આમંત્રિત કરે છે. ભારત આ ટુર્નામેન્ટમાં ૨૩મી વખત અને બેલ્જિયમ ૨૦૦૮ સહિત બીજી વખત રમી રહ્યું છે. આ ટુર્નામેન્ટમાં બેલ્જિયમ પહેલી વખત અને ભારત છઠ્ઠી વખત ટ્રોફી જીતવાનો ટાર્ગેટ રાખશે. ઑસ્ટ્રેલિયા સૌથી વધુ ૧૦ વખત આ ટાઇટલ જીત્યું છે અને ૨૦૨૪માં જપાન આ ટાઇટલ જીત્યું હતું. જોકે બન્નેને આ વખતે રમવા માટેનું આમંત્રણ મળ્યું નહોતું. યજમાન મલેશિયા માત્ર ૨૦૨૨માં આ ટાઇટલ જીત્યું હતું.
