આ ગીત માટે મુંબઈમાં જ દુબઈ જેવા ભવ્ય સેટ બનાવવામાં આવશે
‘વેલકમ ટુ ધ જંગલ’ના ગીતનું શૂટિંગ ૧૫ એપ્રિલથી મુંબઈમાં શરૂ કરવામાં આવશે
આ વર્ષે અક્ષય કુમારની ‘ભૂત બંગલા’, ‘વેલકમ ટુ ધ જંગલ’ અને ‘હૈવાન’ જેવી ફિલ્મ રિલીઝ થવાની છે. જોકે ‘વેલકમ ટુ ધ જંગલ’ અને ‘હૈવાન’ની સત્તાવાર રિલીઝ-તારીખ જાહેર કરવામાં આવી નથી. હવે માહિતી મળી છે કે અક્ષય કુમારની ‘વેલકમ ટુ ધ જંગલ’ માટે દુબઈમાં એક ગીતનું શૂટિંગ થવાનું હતું, પરંતુ હાલની આંતરરાષ્ટ્રીય પરિસ્થિતિને ધ્યાનમાં રાખીને આ પ્લાન કૅન્સલ કરવામાં આવ્યો છે. સલામતીનાં કારણોસર મેકર્સે આ નિર્ણય લીધો છે.
હવે મેકર્સે નવી યોજના બનાવી છે. એના અનુસાર આ ગીત માટે મુંબઈમાં જ દુબઈ જેવા ભવ્ય સેટ બનાવવામાં આવશે. માહિતી મુજબ મઢ આઇલૅન્ડ, ગોલ્ડન ટબૅકો સ્ટુડિયો અને ગોરેગામની ફિલ્મસિટી ખાતે મોટા સેટ તૈયાર કરવામાં આવશે. આ સેટમાં નાઇટક્લબ, કસીનો અને પ્રાઇવેટ જેટ જેવા સીન દેખાડવામાં આવશે. હવે આ ગીતનું શૂટિંગ ૧૫ એપ્રિલથી મુંબઈમાં શરૂ કરવામાં આવશે.
