સલમાન ખાનનો કોર્ટમાં બચાવ : મેં પાનમસાલાનું નહીં, સિલ્વર કોટેડ ઇલાયચીનું પ્રમોશન કર્યું છે

સલ્લુ સામે ફરિયાદ કરવામાં આવી હતી કે તેણે કરેલી જાહેરાત જનતાને ભ્રમિત કરનારી છે

સલમાન ખાન

થોડા સમય પહેલાં કોટાના ભારતીય જનતા પક્ષ (BJP)ના નેતા અને વકીલે સલમાન ખાન અને પાનમસાલા કંપની સામે ફરિયાદ નોંધાવી હતી. ફરિયાદમાં દાવો કરવામાં આવ્યો હતો કે સલમાન ખાને કરેલી જાહેરાત જનતાને ભ્રમિત કરનારી છે, કારણ કે પાંચ રૂપિયાના પાઉચમાં અસલી કેસર હોવું શક્ય જ નથી. આ વિવાદમાં હવે સલમાને પોતાના તરફથી મોટું નિવેદન આપ્યું છે. સલમાન સામે દાખલ થયેલી ફરિયાદ પર ચાલી રહેલી સુનાવણી દરમ્યાન તેના વકીલે કોર્ટમાં સ્પષ્ટ કર્યું હતું કે સલમાને ક્યારેય પાનમસાલાની જાહેરાત કરી નથી, તેણે માત્ર સિલ્વર-કોટેડ ઇલાયચીનું પ્રમોશન જ કર્યું છે, જે કાનૂની રીતે પાનમસાલાની શ્રેણીમાં આવતું નથી. વકીલે જણાવ્યું હતું કે આ ફરિયાદ ‘બિનજરૂરી સતામણી’ સિવાય કાંઈ નથી.

વકીલે એવી પણ દલીલ કરી હતી કે કન્ઝ્યુમર કમિશન પાસે આ મામલે કાર્યવાહી કરવાનો અધિકાર જ નથી. તેના જણાવ્યા મુજબ સલમાન ન તો આ ઉત્પાદનનો ઉત્પાદક છે કે ન તો કોઈ સેવા પ્રદાન કરે છે એટલે તેને આ કેસમાં ‘પાર્ટી’ બનાવવા માટે કોઈ કાનૂની આધાર રહેતો નથી. તેની દલીલ હતી કે કન્ઝ્‍યુમર કમિશન તરફથી લેવાયેલું પગલું તેમના અધિકારક્ષેત્રની બહાર છે.