અગાઉ આ જ વિષયની વાત એક સ્કૂલમાં લેક્ચર માટે ગયો ત્યારે એ સ્કૂલના પ્રિન્સિપાલે કરી હતી કે અમારી સ્કૂલની વિદ્યાર્થિનીઓ સેક્સ-વિષયક કૉલમ ચોરીછૂપીથી વાંચે છે
પ્રતીકાત્મક તસવીર
હમણાં એક સોશ્યલ ફંક્શનમાં જવાનું થયું. ત્યાં એક કપલ મળ્યું. એ કપલે જે ફરિયાદ કરી એ ફરિયાદ સાંભળીને ખરેખર આપણી માનસિકતા પર શરમ અને સંકોચ આવવાનું શરૂ થઈ ગયું. એ કપલે એવી ફરિયાદ કરી કે ન્યુઝપેપરમાં સેક્સ વિષય પર કૉલમ આવે છે એટલે અમે અમારાં સંતાનોને પેપર વાંચવા નથી આપતા!
અગાઉ આ જ વિષયની વાત એક સ્કૂલમાં લેક્ચર માટે ગયો ત્યારે એ સ્કૂલના પ્રિન્સિપાલે કરી હતી કે અમારી સ્કૂલની વિદ્યાર્થિનીઓ સેક્સ-વિષયક કૉલમ ચોરીછૂપીથી વાંચે છે. એ લેક્ચરનો વિષય જુદો હતો એટલે જવાબ આપવાનો રહી ગયો પણ આજે એ જ વાતની ચર્ચા અહીં કરવી છે. તમે સારી રીતે સમજી શકો કે માણસને જિજ્ઞાસા કયા વિષયની હોય? એ જ વિષયની, જેના માટે તે કોઈને પૂછી શકતા નથી અને એ જિજ્ઞાસા અન્ય કોઈ રીતે પણ ફળીભૂત થતી નથી હોતી. એવા સમયે માણસ શું કરે, તેને જે જ્ઞાનસ્રોત દેખાય એનો ઉપયોગ કરવાનું શરૂ કરી દે. આપણે ત્યાં હજી સિસ્ટમ ડેવલપ નથી થઈ પણ વેસ્ટર્ન કન્ટ્રીઝમાં તો ટીનેજની મનની મૂંઝવણની કૉલમ મોટા ભાગનાં ન્યુઝપેપર અને મૅગેઝિનમાં આવે છે અને એ બહુ પૉપ્યુલર પણ છે. આપણા દેશની કઠણાઈ જુઓ, આપણે ત્યાં તો યંગ કપલ જ નહીં; આધેડ વયના લોકો પણ હજી સેક્સની બાબતમાં બહુ અવઢવમાં જીવતા હોય છે એટલે આપણે ત્યાં કૉલમ પણ તેમને જ ધ્યાનમાં રાખીને લખાય છે તો સવાલ-જવાબની કૉલમમાં પણ તેમના જ સવાલો સૌથી વધારે આવે છે કારણ કે ટીનેજર્સને એ વિશે પૂછવાની કે બોલવાની મનાઈ છે.
ADVERTISEMENT
સંતાન જ્યારે પોતાના પ્રાઇવેટ પાર્ટને ટચ કરતું હોય ત્યારે ‘છીઇઇઇ, ગંદું કહેવાય’ એવું ઑલમોસ્ટ બધી જ મમ્મીઓ બોલે છે. નાનપણથી જ આપેલી આ શીખ વચ્ચે જ્યારે બૉડીમાં હૉર્મોનલ ચેન્જિસ આવે અને સેક્સ વિશે જાણવાનું તેમને મન થાય ત્યારે તેમની પાસે લિમિટેડ સોર્સ છે. ઇન્ટરનેટ પર મળતા જ્ઞાનમાં વિકૃતિ વધારે હોય છે એટલે બાળક એ દિશામાંથી કંઈ ગેઇન કરે એવી અપેક્ષા રાખવી ન જોઈએ. દરેક પેરન્ટને કહેવાનું મન થાય કે દેશમાં સેક્સ-એજ્યુકેશન સત્તાવાર બને અને ઑથેન્ટિક રીતે કામ કરે એ પહેલાં પ્રોફેશનલ દ્વારા લખાતી આ પ્રકારની કૉલમ વાંચવા માટે તેમણે સામે ચાલીને તેમનાં ટીનેજ સંતાનોને શિખામણ આપવી જોઈએ અને એ બ્રૉડનેસ પણ દેખાડવી જોઈએ કે એ સવાલ વાંચ્યા પછી તેમના મનમાં કોઈ સવાલ જન્મે તો પોતે એનો વાજબી જવાબ પણ આપે.
