૨૭ કિલો બાજરાનો લોટ, દોઢ કિલો નમક, ૫૦૦ ગ્રામ આદું-મરચાંનો મસાલો અને ૩ ડોલ પાણીથી લોટ બાંધીને ૩ સ્વયંસેવકોએ દોઢ કલાકમાં બનાવ્યો: ૨૦૦૫ની સાલથી દર વર્ષે બે વાર બને છે આ રોટલો
સૌથી મોટો બાજરાનો રોટલો
જામનગરના હાપામાં જલારામ મંદિર સેવા ટ્રસ્ટ અને સુવર્ણમૂર્તિ પરિવાર દ્વારા ૨૨૬મી જલારામ જયંતી નિમિત્તે સૌથી મોટો બાજરાનો રોટલો બનાવવામાં આવ્યો હતો. ૨૦૦૫ની સાલમાં જાન્યુઆરી મહિનામાં આ પરંપરાની શરૂઆત થઈ હતી અને એ વખતે સાત બાય સાત ફુટના બાજરાના રોટલાને ગિનેસ વર્લ્ડ રેકૉર્ડ્સમાં સ્થાન મળ્યું હતું. એ પછી દર વર્ષે બે વાર આવડો રોટલો બનાવવામાં આવે છે અને એ માટે ૨૭ કિલો બાજરીનો લોટ, દોઢ કિલો નમક, ૫૦૦ ગ્રામ આદું-મરચાંના મસાલાનો ઉપયોગ થાય છે. લોટ બાંધવા માટે ત્રણ બાલદી ભરીને પાણી જોઈએ છે.
એક રોટલો તૈયાર કરવા માટે ત્રણ સ્વયંસેવકો કામ કરે છે અને તેઓ દોઢ કલાકમાં આ રોટલો તૈયાર કરી લે છે. આ વર્ષે પણ જલારામબાપાને આ રોટલો ધરાવાયો હતો અને પછી ભક્તોમાં પ્રસાદ તરીકે વહેંચવામાં આવ્યો હતો.
