ઍપલે કહ્યું કે ભારતમાં જ બનાવીશું આઇફોન, ટ્રમ્પના દબાણમાં નહીં આવીએ : ઍપલ પછી સૅમસંગને પણ ટ્રમ્પે ધમકી આપી
ડોનલ્ડ ટ્રમ્પ
અમેરિકાના રાષ્ટ્રપતિ ડોનલ્ડ ટ્રમ્પે ચેતવણી આપી છે કે દેશની બહાર બનેલા તમામ સ્માર્ટફોન પર ટૂંક સમયમાં ૨૫ ટકા ટૅરિફ લાદવામાં આવી શકે છે. આ સ્માર્ટફોનમાં ઍપલના આઇફોન તેમ જ સૅમસંગ અને અન્ય કંપનીઓનાં ઉપકરણોનો સમાવેશ થાય છે. ટ્રમ્પે કહ્યું હતું કે ‘જો આ સ્માર્ટફોનનું ઉત્પાદન અમેરિકામાં જ થશે તો કોઈ ટૅરિફ નહીં લાગે. એ જ સમયે જો આનું ઉત્પાદન બહાર કરવામાં આવશે અને અમેરિકામાં વેચવામાં આવશે તો ટૅરિફ ચૂકવવી પડશે. આ નીતિ ફક્ત ઍપલને અસર કરશે એવું નથી, એ એના કરતાં ઘણી વધુ વ્યાપક હશે.’
જોકે ઍપલે તાજેતરમાં કહ્યું છે કે ભારતમાં એની રોકાણયોજનાઓમાં કોઈ ફેરફાર કરવામાં આવ્યો નથી, ભારતમાં આઇફોનના પ્રોડક્શનથી કંપનીને ઘણો ફાયદો થશે એટલા માટે કંપની રાજકીય દબાણમાં કોઈ નિર્ણય નહીં લે.
