રવિવારે ફટાકડાને કારણે આગની ૧૩૭ ચિંતાજનક ઘટનાઓ નોંધાઈ હતી, જેમાં ફાયરબ્રિગેડના બે જવાનો ઘાયલ થયા હતા.
પ્રતીકાત્મક તસવીર
મુંબઈમાં આ દિવાળી દરમ્યાન આગની ઘટનાઓમાં મોટો ઉછાળો જોવા મળ્યો છે. અધિકારીઓએ સોમવારે જણાવ્યું હતું કે રવિવારે ફટાકડાને કારણે આગની ૧૩૭ ચિંતાજનક ઘટનાઓ નોંધાઈ હતી, જેમાં ફાયરબ્રિગેડના બે જવાનો ઘાયલ થયા હતા.
બૃહન્મુંબઈ મ્યુનિસિપલ કૉર્પોરેશન (BMC) દ્વારા આપવામાં આવેલા આંકડા મુજબ એક જ દિવસમાં નોંધાયેલી આ સંખ્યા અગાઉનાં વર્ષોના સમગ્ર દિવાળી સમયગાળા દરમ્યાન ફટાકડાને કારણે લાગેલી આગની કુલ સંખ્યા (૨૦૨૪માં ૮૦ અને ૨૦૨૫માં ૧૧૩) કરતાં પણ વધારે છે. આ વર્ષે ૬ નવેમ્બરથી ૯ નવેમ્બરની વચ્ચે આગની નાનીમોટી કુલ ૨૦૦ ઘટનાઓ ફટાકડાને કારણે બની હતી, જે ૨૦૨૪ અને ૨૦૨૫ના સમગ્ર દિવાળી સમયગાળાના આંકડાઓ કરતાં વધુ છે.
આ વર્ષે માત્ર દિવાળીની રાતે રવિવારે જ આગની ૧૪૨ ઘટનાઓ નોંધાઈ હતી. આ અચાનક વધારાને કારણે મુંબઈ ફાયરબ્રિગેડ પર ભારે પ્રેશર આવ્યું હતું, કારણ કે તેમણે શહેરના વિવિધ વિસ્તારોમાં એકસાથે અનેક મોટી આગની ઘટનાઓને કાબૂમાં લેવી પડી હતી.
એક ફાયર-ઑફિસરે કહ્યું હતું કે વિદ્યાવિહારમાં જ્યારે અમે આગને કાબૂમાં લેવાનો પ્રયાસ કરી રહ્યા હતા ત્યારે પણ ત્યાંના રહેવાસીઓ ફટાકડા ફોડવાનું ચાલુ રાખતા હતા.
