BMCનું ૭૪,૪૨૭ કરોડ રૂપિયાનું બજેટ

ઇન્ફ્રાસ્ટ્રક્ચર, શિક્ષણ, પર્યટન અને પ્રદૂષણને પ્રાથમિકતા આપતું BMCનું ૭૪,૪૨૭ કરોડ રૂપિયાનું બજેટ, ચૂંટણીને ધ્યાનમાં રાખીને કોઈ નવા ટૅક્સ નાખવામાં ન આવ્યા : ગયા વર્ષના ૬૫,૧૮૦ કરોડ રૂપિયાની સરખામણીમાં અંદાજપત્રમાં કરવામાં આવ્યો ૧૪.૧૯ ટકાનો વધારો

ગઈ કાલે બૃહન્મુંબઈ મ્યુનિસિપલ કૉર્પોરેશનના હેડક્વાેર્ટરમાં ઍડ્‍મિનિસ્ટ્રેટર-કમ-કમિશનર ભૂષણ ગગરાણીએ બજેટ રજૂ કર્યું હતું. તસવીર ઃ સૈયદ સમીર અબેદી

એશિયાની સૌથી શ્રીમંત બૃહન્મુંબઈ મ્યુનિસિપલ કૉર્પોરેશન (BMC)નું ગઈ કાલે ૭૪,૪૨૭ કરોડ રૂપિયાનું મસમોટું બજેટ રજૂ કરવામાં આવ્યું હતું. કોઈ નવો ટૅક્સ નાખ્યા વિનાના બજેટમાં ઇન્ફ્રાસ્ટ્રક્ચર, શિક્ષણ, પર્યટન અને પ્રદૂષણને પ્રાથમિકતા આપવામાં આવી છે. ગયા વર્ષે ૬૫,૧૮૦ કરોડ રૂપિયાનું બજેટ હતું, જેમાં આ વર્ષે ૧૪.૧૯ ટકાનો વધારો કરવામાં આવ્યો છે. BMCની ચૂંટણી આ વર્ષે પણ નથી થઈ એટલે સતત ત્રીજા વર્ષે ઍડ્મિનિસ્ટ્રેટર કમ કમિશનર ભૂષણ ગગરાણ‌ીએ બજેટની જાહેરાત કરી હતી.

વર્ષ ૨૦૨૫-’૨૬ના બજેટમાં શહેરના રોડ, ફ્લાયઓવર ‌સહિતના ઇન્ફ્રાસ્ટ્રક્ચર માટે ૫૧૦૦ કરોડ રૂપિયા ફાળવવામાં આવ્યા છે. 

ADVERTISEMENT

શૈક્ષણિક ઇન્ફ્રાસ્ટ્રક્ચરમાં સુધારો કરવા માટે ૩૩૨૧.૫૫ કરોડ રૂપિયા ફાળવવામાં આવ્યા છે. BMCએ આ કામને મિશન સંપૂર્ણ નામ આપ્યું છે જેમાં સ્કૂલનું ઇન્ફ્રાસ્ટ્રકચર, ઍડ્મિશન, મેરિટ, પ્રોડક્ટિવિટી, રિસ્પૉન્સિબિલિટી, ન્યુટ્રિશન અને હેલ્થ વગેરેનું ડેવેલપમેન્ટ કરવામાં આવશે. 

મુંબઈના વાતાવરણમાં સુધારો કરવા માટે ૧૧૩.૧૮ કરોડ રૂપિયાની જોગવાઈ કરવામાં આવી છે. પર્યટકોને આકર્ષવા માટે રાણીબાગમાં જિરાફ, ઝેબ્રા, સફેદ સિંહ અને જૅગ્વાર વગેરે વિદેશી પ્રાણીઓને લાવવામાં આવશે અને એ માટેની તૈયારી કરવા પચીસ કરોડ રૂપિયા ફાળવવામાં આવ્યા છે.  

ખોટ કરી રહેલી BESTને બજેટમાં ફાળવવામાં આવેલા ૧૦૦૦ કરોડ રૂપિયાથી ઇલેક્ટ્રિક બસ ખરીદવામાં આવશે
મુંબઈગરાઓની બીજી લાઇફલાઇન ગણાતી બૃહન્મુંબઈ ઇલેક્ટ્રિક સપ્લાય ઍન્ડ ટ્રાન્સપોર્ટ (BEST) અન્ડરટેકિંગ ખોટમાં ચાલી રહી છે. BESTને ઉગારવા માટે બૃહન્મુંબઈ મ્યુનિસિપલ કૉર્પોરેશન (BMC)એ ગઈ કાલે રજૂ કરેલા બજેટમાં ૧૦૦૦ કરોડ રૂપિયા ફાળવ્યા છે. આ ફન્ડ BESTના ઇન્ફ્રાસ્ટ્રક્ચરના ડેવલપમેન્ટ, મહત્ત્વનાં ઉપકરણોની ખરીદી, લોનનું રીપેમેન્ટ, ટ્રાન્સપોર્ટ મૅનેજમેન્ટ સિસ્ટમ, કર્મચારીઓને દિવાળીનું બોનસ અને પેન્શન તેમ જ બાકી રહેલાં વીજળીનાં પેમેન્ટ કરવામાં વાપરવામાં આવશે. ૨૦૧૨-’૧૩થી અત્યાર સુધી ખોટમાં ચાલી રહેલી BESTને BMCએ ૧૧,૩૦૪.૫૯ કરોડ રૂપિયાની આર્થિક મદદ કરી છે. બજેટમાં નવી ઇલેક્ટ્રિક બસ ખરીદવા માટે ૯૯૨ કરોડ રૂપિયાનું ફન્ડ મંજૂર કરવામાં આવ્યું છે.

સ્લમના કમર્શિયલ યુનિટ્સ પાસેથી પ્રૉપર્ટી ટૅક્સ વસૂલવાની તૈયારી
મુંબઈમાં બૃહન્મુંબઈ મ્યુનિસિપલ કૉર્પોરેશન (BMC)એ પ્રૉપર્ટી કે પાણીના ટૅક્સમાં કોઈ વધારો નથી કર્યો. જોકે મુંબઈના સ્લમમાં લગભગ ૫૦,૦૦૦ કમર્શિયલ યુનિટ્સ છે એના પર ટૅક્સ નાખવાની તૈયારી બજેટમાં કરવામાં આવી છે. ૨૦૨૫-’૨૬માં આવા યુનિટ્સમાંથી વર્ષે ૩૫૦ કરોડ રૂપિયાની વધારાની આવક મેળવવા માટે આ નિર્ણય લેવામાં આવ્યો હોવાનું જાણવા મળ્યું હતું. જોકે આને માટે સરકારનું અપ્રૂવલ લેવાનું હજી બાકી છે. BMCનું કહેવું છે કે આ પૈસા તેઓ સ્લમ્સના ડેવલપમેન્ટ પાછળ જ વાપરશે.

રાજ્ય સરકાર પોતાના હિસ્સાના ઍડિશનલ FSIના પૈસામાંથી અમુક ભાગ BMCને આપશે
બિલ્ડરોને ઝોનલ ફ્લોર સ્પેસ ઇન્ડેક્સ (FSI) ઉપરાંત આપવામાં આવતા ઍડિશનલ FSI માટે તેમની પાસેથી પ્રીમિયમ વસૂલ કરવામાં આવે છે. જોકે આ પૈસા બૃહન્મુંબઈ મ્યુનિસિપલ કૉર્પોરેશન (BMC) અને રાજ્ય સરકાર વચ્ચે ૨૫ઃ૭૫ના ભાગે વહેંચવામાં આવતા હોવાથી BMCએ પોતાનો શૅર પચીસ ટકાથી વધારીને ૫૦ ટકા કરી આપવાનું રાજ્ય સરકારને કહ્યું હતું. આ બાબતે રાજ્ય સરકારે ગયા વર્ષના ઑક્ટોબર મહિનામાં એક નોટિફિકેશન બહાર પાડ્યું હતું જેમાં BMCની માગને મંજૂર કરવામાં આવી હતી. આને લીધે હવે આ વર્ષે BMCની પ્રીમિયમની આવકમાં ૩૦૦ કરોડ રૂપિયા જેટલો વધારો થવાની શક્યતા છે.