મુંબ્રા પોલીસે આકસ્મિક મૃત્યુની નોંધ કરીને વધુ તપાસ શરૂ કરી
ડૉક્ટર શર્મિન ડિંગા અને તેમણે જે બિલ્ડિંગમાંથી ઝપલાવ્યું હતું એ ગ્રેસ સ્ક્વેર બિલ્ડિંગ.
મુંબ્રા વિસ્તારમાં આવેલા ગ્રેસ સ્ક્વેર બિલ્ડિંગના છઠ્ઠા માળેથી ઝંપલાવીને ગઈ કાલે સવારે ડૉક્ટર શર્મિન ડિંગાએ આત્મહત્યા કરી હોવાની ચોંકાવનારી માહિતી પ્રકાશમાં આવી છે. આ મામલે મુંબ્રા પોલીસે હાલ આકસ્મિક મૃત્યુની નોંધ કરીને વધુ તપાસ શરૂ કરી છે. ડૉક્ટર શર્મિન ડિંગા થાણે મ્યુનિસિપલ કૉર્પોરેશન (TMC) સંચાલિત હકીમ અજમલ ખાન હૉસ્પિટલમાં કામ કરતાં હતાં. તેથી આ ઘટનાને પગલે સમગ્ર TMCના મેડિકલ વિભાગ અને થાણેમાં ભારે ખળભળાટ મચી ગયો હતો. આ દુર્ઘટનાથી સ્થાનિક રહેવાસીઓમાં શોક અને અરેરાટી વ્યાપી ગઈ છે.
મુંબ્રા પોલીસ-સ્ટેશનના એક સિનિયર અધિકારીએ ‘મિડ-ડે’ને કહ્યું હતું કે ‘ડૉ. શર્મિન ડિંગા ગઈ કાલે વહેલી સવારે પોતાના બિલ્ડિંગના છઠ્ઠા માળેથી નીચે પટકાયાં હતાં. ખૂબ જ ઊંચાઈએથી નીચે પડવાને કારણે તેમને ગંભીર ઈજાઓ થઈ હતી અને તેમનું ઘટનાસ્થળે જ મોત થયું હતું. ઘટનાની જાણ થતાં જ મૃતદેહને પોસ્ટમૉર્ટમ માટે છત્રપતિ શિવાજી મહારાજ હૉસ્પિટલમાં ખસેડવામાં આવ્યો હતો. પ્રાથમિક તપાસમાં આ આત્મહત્યાનો મામલો હોવાનું જણાય છે, પરંતુ આટલું મોટું પગલું ભરવા પાછળનું ચોક્કસ કારણ હજી સુધી સ્પષ્ટ થઈ શક્યું નથી. ડૉ. શર્મિન ૩ સંતાનોનાં મમ્મી હતાં અને તેમના પતિ નોકરી અર્થે વિદેશમાં સ્થાયી થયા છે. ઘરમાં હસતાં-રમતાં બાળકો હોવા છતાં અને વ્યવસાયે ડૉક્ટર હોવા છતાં તેમણે આવું અંતિમ પગલું કેમ ભર્યું એ વિશે તપાસ કરવામાં આવી રહી છે. આ કેસમાં તેમના પરિવારજનો અને નજીકના મિત્રોની પૂછપરછ કરવામાં આવી રહી છે જેથી તેમના માનસિક તનાવ અથવા અંગત જીવનમાં કોઈ સમસ્યા હતી કે કેમ એ જાણી શકાય. હાલમાં આ મામલે અકસ્માત મોતનો ગુનો નોંધ્યો છે.’
